Կորոնավիրուսով ստեղծված իրավիճակը լավ առիթ է ճիշտ հետևություններ անելու համար՝ կարծում է «Արժեքների հեղափոխություն» հաղորդման հեղինակ Վահե Հովհաննիսյանը։
Առաջին հետևության առիթը, ըստ նրա, զարգացած երկրների արձագանքն էր։ «Հասկացանք, որ զարգացած երկրները երաշխավորված ու պաշտպանված չեն, և փոքր պետություններն ավելի հեշտ են կառավարում իրավիճակը», -ասում է Հովհաննիսյանը։
Հետևություններից մյուսն, ըստ նրա, Հայաստանի հանրության, ընդհանուր առմամբ գիտակից վերաբերմունքն է։ Այս գիտակցությունը պետք է օգտագործենք ոչ թե միայն կրիտիկական պահերին, այլև՝ ընդհանրապես՝ կարծում է Հովհաննիսյանը։
Հետևություններից երրորդն ամենասկզբունքայինն է։ Համաշխարհային տնտեսությունը կորոնավիրուսի հետևանքով արդեն կորցրել է 6 տրիլիոն դոլար, ինչը գրեթե այնքան է, որքան Ճապոնիայի համախառն ներքին արդյունքը։
«Արժեքների հեղափոխություն» հաղորդման հեղինակն առաջարկում է իրավիճակը դիտարկել այլ տեսանկյունից։
«Արդեն խոսել ենք այն մասին, որ ՀՆԱ-ն չի բնութագրում մարդկանց երջանկությունը և դժբախտությունը։ Եթե ՀՆԱ-ն փոքրացել է, նշանակում է՝ ավելի քիչ ապրանքներ և ծառայություններ են արտադրվում, սրանից էլ հետևում է, որ մարդիկ ավելի քիչ են սպառում։ Եթե ճիշտ հետևություններ անենք, գուցե հասկանանք, որ աշխարհում գերարտադրություն է, որ մեզ ավելի փոքր ՀՆԱ է պետք»,-ասում է Հովհաննիսյանը։
