Արցախում կորոնավիուսի դեպք չի արձանագրվել: Ստեղծված միջգերատեսչական հանձանժողովը կանխարգելիչ միջոցառումներ է իրականացնում, որոնց շարքում նաև Հայաստանի Հանրապետության հետ ավտոճանապարհային հաղորդակցության սահմանփակումներն են:
Այդ աշխատանքին օժանդակեում է նաև ՀՀ ոստիկանությունը, որի ստորաբաժանումները, ըստ Արցախում ստեղծված տեղեկատվական շտաբի հայտարարության, կայուն պահակակետեր են ձևավորել Սոթք–Քարվաճառ ճանապարհին, նաև Տեղ և Սյունիք գյուղերի մոտ` ժամանակավորապես արգելելով բոլոր անձանց մուտքն Արցախի Հանրապետություն:
Արցախում կորոնավիրուսի դեպք չկա, դրա տարածումը կանխարգելելուն ուղղված միջոցառումների շրջանակում երեկ կառավարությունը որոշում է ընդունել մինչև մարտի 31-ը հանրային իշխանության մարմինների և նրանց ենթակա կազմակերպությունների գործունեության նկատմամբ մի շարք սահմանափակումների մասին: Մի շարք կառույցներ անցել են հեռավար գործունեության։
Հանրային իշխանության մարմինների վարչական շենքերում արգելվել է աշխատակիցների մուտքը, կասեցվել են հանրային սպասարկող գրասենյակների գործունեությունը: Այս սահմանափակումներին զուգահեռ` Ստեփանակերտում և մյուս բնակավայրերում բնականոն աշխատում են խանութները, կենցաղսպասարկամն որոշ օբյեկտներ: Սահմանափակումները տարածվել են նաև Հայաստանի Հանրապետության հետ կապի վրա:
Մասնավորապես` արգելված է ավտոմոբիլային շարժը` բացառությամբ Արցախի Հանրապետությունում հաշվառում ունեցող անձանց, բեռնափոխադրում իրականացնող տրանսպորտային միջոցների, Արցախում կայանալիք ընտրություններին դիտորդական առաքելություն իրականացնողների եւ լրագրողների համար: Կորոնավիրուսի և ընտրությունների թեման քննարկվում են զուգահեռ: Հիմնական հարցն է հետաձգե՞լ ընտրությունները, թե՞ ոչ:
Ընտրություններին մասնակցող քաղաքական ուժերն ու նախագահի թեկնածուները տարբեր տեսակետներ ունեն: Վիտալի Բալասանյանն ու նրան առաջադրած «Արդարություն» կուսակցությունն առաջարկում են արտակարգ դրություն հայտարարել: Նույն պահանջն են առաջարդրում նախագահի թեկնածուներ Վահան Բադասյանը, Ռուսլան Իսրայելյանը՝ իրենց աջակից կուսակցություններով, Քրիստին Բալայանը, Աշոտ Դադայանը: Դավիթ Իսրայելյան «Անկախության սերունդ» կուսակցության նախագահ:
Արցախի հեղափոխական կուսակցությունը ընտրարշավի մեկնարկից պահանջում էր նախագահ Բակո Սահակյանի հրաժարականը և ընտրությունների հետաձգումը: Արդեն մի քանի օր է նրանք Ստեփանակերտում վրան են տեղադրել: Պահանջը չի փոխվել:
Այս կուսակցության երկու համախոհներ ընտրությունները հետաձգելու պահանջով հացադուլ են սկսել:
Հայտարարություն է տարածել նախագահի թեկնածու Մասիս Մայիլյանը: Նա նշել է, որ ըմբռնումով կընդունի, եթե որոշվի հետաձգել ընտրությունները։: Հետաձգելուն կողմ են նախագահի թեկանծուներից Հայկ Խանումյանը, Մելսիկ Պողոսյանը: Այլ կարծիքի են խորհրդարանում ներկայացված ուժերը, որոնք, ըստ Արցախի նախագահականի տարածած հաղորդագրության, սատարում են իշխանություններին: Բակո Սահակյանը հարցը քննարկել է «Ազատ Հայրենիք», ՀՅԴ, Արցախի ժողովրդավարական կուսակցությունների հետ:
Այսօրվա դրությամբ ընտրությունների նախապատրաստությունները շարունակվում են:
