Նոր Կորոնավիրուսի մասին առաջին տեղեկությունները Չինաստանը հայտնեց դեռ անցյալ տարվա դեկտեմբերին։ Հունվարին արդեն, երկրի առանձին քաղաքներ ու հատվածներ կարանտինային գոտում էին։ Էպիկենտրոնը Եվրոպա չէր տեղափոխվել։
Հունվարի 31-ին Չինաստանի Ժողովրդական Հանրապետությունից Հայաստան է ժամանում մեր հայրենակից Արամ Հարությունյանը։
«Ես 14 օր մեկուսացել եմ, ինքս իմ նախաձեռնությամբ։ Յուրաքանչյուրն ինքը պետք է գիտակից լինի ու պատասխանատու ոչ միայն իր, այլև իր շրջապատի համար»,- «Ռադիոլուրի» հյուրասրահում ասում է նա։
Արամն ապրել է Շանհայ քաղաքում, այնտեղ, որտեղ Կորոնավիրուսի դեպքերը համեմատաբար քիչ են եղել։
Նա կարծում է, որ ինքնագիտակցումը ամենակարևոր խթանն է վիրուսի կանխարգելման աշխատանքները արագացնելու համար։ Բայց նաև կարծում է, որ պետք չէ որոշում կայացնելը թողնել քաղաքացու վրա, պետությունն ինքը պետք է պարտադրի ինքնամեկուսացումը։