Նախորդ երկու տարիներին Եվրամիության անդամ երկրներում առաջին անգամ ապաստան հայցող ՀՀ քաղաքացիների ընդհանուր թիվը կրճատվել է շուրջ երկու անգամ՝ 6875-ից դառնալով 3525:
«Ռադիոլուրի հյուրասրահում» անդրադառնալով Եվրաստատի՝ միգրացիոն հոսքերին վերաբերող վիճակագրությանը՝ ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանը փոփոխությունը բեկումնային է որակել։
Նա կարծում է, որ վիճակագրության փոփոխությունը լավ նախադրյալ է Եվրամիության հետ վիզաների ազատականացման երկխոսության մեկնարկն արագացնելու համար:
Վիճակագրությունը փոխվել է Հայաստանի ներքին ազդակների արդյունքում՝ ասել է Եղոյանը և նշել, որ միտումը փարատում է ԵՄ–ի հետ հարաբերությունների ազատականացման հիմնական մտահոգությունը.
«Վիզաների ազատականացումը սկսելիս` հիմնական մտավախությունը մեկն էր, որ կլինի ապաստան հայցելու մեծ աճ։ Այս վիճակագրությունը փարատում է այդ մտավախությունը և անկյունաքարային նշանակություն ունի»,- ասել է Եղոյանը։
Արման Եղոյանն անդրադարձել է նաև վարչապետ Նիկոլ Փաշինյանի բրյուսելյան այցին, որի օրակարգում Հայաստան– ԵՄ երկխոսությունն է , ինչպես նաև Եվրոպայի ամենամեծ կուսակցության՝ ԵԺԿ–ի հետ հարաբերությունները։