Հայաստանի ղեկավարության նախաձեռնած քաղաքական ազատականացումը դրական ազդեցություն է թողել Լեռնային Ղարաբաղի վրա, որտեղ ավելացել է մրցակցությունը, ակտիվացել է քաղաքացիական հասարակությունը։
Նման գնահատական է տալիս Freedom House իրավապաշտպան կազմակերպությունն իր «Ազատությունը աշխարհում — 2020» գլոբալ զեկուցում, որը հրապարակվել է օրեր առաջ: Գնահատականը վերաբերում է 2019–ի ՏԻՄ ընտրություններին։
«Թրանսփարենսի ինթերնեյշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը չափազանց կարևոր է համարում, որ մարտի 31–ին կայանալիք խորհրդարանական ընտրություններն Արցախում նույնպես անցնեն ազատ և արդար, մրցակցային պայմաններում։
Freedom House –ի զեկույցի հեղինակները Լեռնայիրն Ղարաբաղում տեղի ունեցող ներքաղաքական գործընթացները շահեկանորեն առանձնացնում են Եվրասիական տարածաշրջանի մյուս անջատված տարածքներում տեղի ունեցող գործընթացներից։
Վարուժան Հոկտանյանը սա կարևորագույն փաստարկ է համարում Լեռնային Ղարաբաղի միջազգային ընկալման տեսանկյունից․ ժողովրդավարության ճանապարհով գնացող Արցախը չի կարող լինել ավտորիտար, բռնապետական Ադրբեջանի կազմում։
Հայաստանում գրանցված դրական առաջընթացն ամրագրելու տեսանկյունից Վարուժան Հոկտանյանը կարևորում է նաև Սահմանադրության հանրաքվեի ազատ, արդար և առանց կեղծիքների անցկացումը։ «Դա կարևոր է ոչ միայն մեր երկրի դրական իմիջի, Արցախի խնդրի, այլև ներդրումների համար․ այդ թվերին նայում են նաև պոտնեցիալ ներդրողները»,– փաստում է նա։
«Ռադիոլուրի հյուրասրահ»– ում Վարուժան Հոկտանյանը խոսել է նաև հակակոռուպցիոն քաղաքականության շրջանակներում ԱԺ–ի կողմից առաջին ընթերցմամբ ընդունված երկու օրենսդրական փաթեթների մասին՝ նշելով դրանց խութերն ու ընդգծելով ճիշտ կիրարկման անհրաժեշտությունը։
Հայաստանում կոռուպցիայի դեմ արդյունավետ պայքարի շրջանակներում նա անհրաժեշտ է համարում ոչ միայն պետծառայողների, այլև ուսուցիչների ու բժիշկների համար բարձր աշխատավարձերի ու պարգևավճարների սահմանումը։