Ուղղորդվա՞ծ են եղել Ազատեկի հանրային լսումները, թե՞ ոչ
Վայոց ձորի Ազատեկ համայնքում օրերս տեղի ունեցավ հերթական հանրային լսումը՝ Ազատեկի ոսկի-բազմամետաղային հանքավայրի հնարավոր շահագործման վերաբերյալ։ Նախաձեռնողը ՝ «Վայկ ինվեստ» ՍՊԸ-ն էր։ 44 կողմ, 42 դեմ ձայների համամասնությամբ հանրային լսումը համարվեց կայացած։ Սակայն հանրային լսումների ընթացքն ուղղորդվել է միջադեպով։
Վայոց ձորի Ազատեկ համայնքում օրերս տեղի ունեցավ հերթական հանրային լսումը՝ Ազատեկի ոսկի-բազմամետաղային հանքավայրի հնարավոր շահագործման շուրջ։ Նախաձեռնողը «Վայկ ինվեստ ՍՊԸ-ն էր։ Վայքի «Աշխատանք և հայրենիք » ՀԿ նախագահ, հանրային խորհրդի անդամ Ռուզան Ղազարյանն, որը ևս մասնակցել է քննարկմանը, մեզ պատմեց` այն տեղի ունեցել գյուղապետարանի դահլիճում ։
«Ոտքի վրա քննարկումը տեղի ունեցավ։ Ազատեկ գյուղից մասնակցել է շուրջ 100 բնակիչ։ Ինչ- որ ուղղորդվածություն ես նկատում էի։ Համայնքի ղեկավարի ազդեցության դաշտում գտնվող մարդիկ էին, որոնք կողմ էին շահագործմանը»,– ասաց Ռուզան Ղազարյանը:
Ազատեկում 44 կողմ, 42 դեմ ձայների համամասնությամբ հանրային լսումը համարվել է կայացած: Ռուզան Ղազարյանի կարծիքով` ընկերության համար ոչ այնքան էական է, թե քանի հոգի է կողմ կամ դեմ, այլ հանրային լսումների անցկացման փաստը։
Իսկ ահա Ազատեկ համայնքի ղեկավար Սիսակ Հովսեփյանն, մեզ հետ զրույցում նշում էր` ուղղորդվածություն չի եղել․ «Սխալ հայտարարություններ այդ ժամանակ էլ են արել, որ ուղղորդված է եղել։ Մարդիկ հավաքվել եկել են, իրենց կարծիքն են ասել։ Բա «դեմ»–երի՞ն ով ա ուղղորդել»։
Գյուղապետը նաև տեղյակ չէր, թե ինչու են համագյուղացիների մի մասը կողմ, մյուս մասը՝ դեմ։ Բոլոր դեպքերում գյուղն ունի շուրջ 600 բնակիչ: Ազատեկը խոշորացված Վայք համայնքի ամենախոշոր գյուղերից է: «Վայկ ինվեստ ՍՊԸ –ից առաջ նույն հանքավայրի շահագործման համար հայտ էր ներկայացրել «Վայքգոլդ» ՍՊԸ-ն։ Երկու անգամ Վայքում լսումները տապալվելուց հետո ընկերության լիազորությունները դադարեցվել են: Հատկանշական է, որ այս հանրային լսումներին մասնակցել է նաև նախկին ընկերության ներկայացուցիչը։ Ներկաները կարծել են, որ դրանց հետևում փաստորեն նույն մարդիկ են ՝ տարբեր անուններով։
Սակայն, ինչպես պարզաբանեց Ղազարյանը, քննարկման ընթացքում տեղի է ունեցել միջադեպ․
«Քննարկման ժամանակ «Վայքգոլդ» -ի ներկայացուցիչը հարց ուղղեց «Վայկ-ինվեստ»-ին, թե ինքն աշխատե՞լ է իրենց մոտ: Պատասխանը եղավ դրական: Հետո «Վայքգոլդ»-ի ներկայացուցիչը ասաց, որ դուք աշխատել եք մեր մոտ, գողացել եք մեր փաստաթղթերը և մեր բիզնեսի գաղտնիքները փոխանցել եք «Վայկ-ինվեստ»-ին, հիմա որպես տնօրեն եկել եք ներկայանում եք: Նա ասաց նաև, որ գործը ավարտուն չի և իրենք դիմել ենք դատարան: Բացի այդ, այս քննարկումը, որ դուք սկսել եք, լրիվ անօրինական է»։
ՀԿ ներկայացուցչի խոսքով՝ երկու բիզնեսի ներկայացուցիչները սկսել են բանավիճել: Բոլոր դեպքերում` դեռևս հանրային լսումներ առաջիկայում սպասվում են: Իսկ թե դատական գործընթացները կլինե՞ն շրջադարձային նորաստեղծ ընկերության համար, թե՞`ոչ , ցույց կտան հետագա զարգացումները: