Խայտառակ ընտրություններ․ ԱԺ պատգամավորը՝ Ադրբեջանի ընտրությունների մասին

Լցոնումներ, ծեծկռտուք, խախտումներ, ընդդիմադիր թեկնածուների երկու վստահված անձանց մահ․ ԱԺ «Իմ քայլը» խմբակցության պատգամավոր Տաթեւ Հայրապետյանը Ադրբեջանում կայացած արտահերթ խորհրդարանական ընտրությունները որակում է խայտառակ։ Միլի մեջլիսի պատգամավորներից 65 տոկոսը վերընտրվել է, ինչը նշանակում է, որ խորհրդարանի երիտասարդացումը, ինչի մասին խոսվում էր, տեղի չի ունեցել՝ ասում է պատգամավորը։

Միակ նորությունն, ըստ Հարությունյանի, Իլգար Մամեդովի ղեկավարած քաղաքական ուժի ներկայացուցիչ Գադիրլիի հաղթանակն է, բայց քանի որ քաղաքական շարժումը գրանցված չէ,  նա խորհրդարանում իբրեւ անկախ պատգամավոր կներկայացվի։

Պատգամավորն ուշագրավ է համարում, որ մասնակցությունն ընտրություններին  չի հասնում 50 տոկոսին, ինչը հասարակության շրջանում դրանց նկատմամբ հետաքրքրության պակասի ցուցանիշ է։

Ադրբեջանի դեմոկրատական ուժերի ազգային խորհուրդը, սակայն,  արձանագրում է, որ գրանցվել է 10-20 տոկոս մասնակցություն, ինչը վկայում է, որ  ադրբեջանցի ընտրողները բոյկոտել են ընտրությունները։