ԿարևորՀասարակություն

Պոլսոյ «Լոյս»–ը մէկ տարեկան է. պատկերասփիւռի աշխատակիցները ՝ Հանրային Ռատիօ–ի հիւրերն են

Պոլսոյ մէջ  գործող «Լոյս» պատկերասփիւռը  հիմնադրուեցաւ տարի մը առաջ ։ Հանրային ձայնասփիւռի հիւրերը  «Լոյս»–ի Արևմտահայերէն հաղորդավար Պարգև Սամուէլեանն  ու խմբագիր  Մէյրի Քուրանն են։ Անոնք այցելեցին Հանրային Ռատիօ և մենք խօսեցանք համացանցային պատկերասփիւռի և «Լոյս» պարբերաթերթի մասին, որ ստեղծուած է Քուրան ընտանիքի ներդրումներով ։

Արամ Քուրան իր 3 զաւակներով հիմնադրեց «Լոյս»–ը, որպէսզի Արևմտահայերէնը ապրի և կենդանի կերպով հնչէ Պոլսոյ մէջ։ Ան իր մանկութեան պայմաններ չէ ունեցած լեզուն տիրապետելու լաւապէս, հետևաբար լեզուն պահելն ու սփռելը իր ուսերուն վերցուցած է։

«Լուրերը կը սփռուին ամէն Ուրբաթ երեկոյեան, նաև ունինք հարցազրոյցներ պոլսահայ համայնքի ներկայացուցիչներուն հետ», – ըսաւ հաղորդավար և մեկնաբան Պարգև Սամուէլեան։

«Լոյս»–ը այսօր մէկ տարեկան է։ Մէյրի յայտնեց, որ համացանցային պատկերասփիւռը շուտով կը դառնայ արբանեակային, որուն արտօնութիւնը արդէն առնուած է․ կը մնայ իրագործումը , որ ժամանակի հարց է։

Մեր զրոյցի ընթացքին մենք անդրադարձանք պոլսահայ համայնքի մասին․«Թէև պառակտումներ եղան պատրիարքական ընտրութիւններէն առաջ , բայց հիմա գոյները լրացան, մենք մէկ ենք քոյրեր և եղբայրներ՝ ըսաւ նորընտիր պատրիարք Սահակ եպիսկոպոս Մաշալեանը»,–կը պատմէր Պարգև։

Ան նաև յայտնեց , որ իրենք հեռարձակած են Պոլսոյ 6 եկեղեցիներէն պատրիարքի ընտրութեան օրը։

Պոլսոյ մէջ կը գործէ 38 եկեղեցի, 17 վարժարան և 2 հիւանդանոց՝ Սուրբ Փրկիչ և Սուրբ Յակոբ, ինչպէս նաև մարզական ակումբներ։

«Ես ապշահար մնացի, երբ եկայ Պոլիս ու տեսայ մեծ թիւով եկեղեցիներն ու 70 հազար հայութիւնը»,– ըսաւ զրուցակիցս։ «Այո, հայութեան մեծամասնութիւնը հայախօս չեն, բայց և այնպէս հայ մնալու, հայաշունչ դաստիարակութեամբ իրենց զաւակները սնելու, հայ մշակոյթը , հայ երգն ու արուեստը պահելու , քրիստոնէութիւնը կատարելապէս յաջորդ սերունդներուն փոխանցելու պարտականութիւնը  դարձած է Պոլսահայութեան իղձը», –նկատել տուաւ Պարգև իր խօսքին մէջ ։

Պէյրութէն եկած երիտասարդը ալս բոլորը զգալով՝ որոշած է մնալ Պոլիս և վարել իր աշխատանքը «Լոյս» –ի ընտանիքին հետ միատեղ՝ որպէս Արևմտահայերէնի խօսնակ և մեկնաբան։

Հայաստանի  մէջ երիտասարդները՝ Պարգևն ու Մէյրին,  արտայայտուեցան իրենց ուրախութեան մասին․ «Այստեղ  ամէն տեղ հայերէն գրուած է»։

Back to top button