«Հայաստանում, ինչպես նշում են մի շարք տնտեսագետներ, ցածր է սննդի անվտանգության նկատմամբ վերահսկողությունը։ Այն անհրաժեշտ է ուժեղացնել․ դրսից ներկրվող սննդի որակը մշտապես պետք է լինի ուշադրության կենտրոնում։ Օրինակ, պարզվում է, մեր շուկայում կա չինական լոբի, որը տեղականի համեմատ ավելի մատչելի է»,– ասում է «Հայացք Գյումրիից» հաղորդաշարի հեղինակ Կարեն Ավագյանը։
Տնտեսագետի խոսքով՝ Հայաստանի պարենային անվտանգությունն ամրապնդելու համար անհրաժեշտ է քայլեր ձեռնարկել արտաքին աղբյուրների դիվերսիֆիկացման՝ ներմուծման ճանապարհների փոփոխման ուղղությամբ։
«Մենք պետք է մշտապես ունենանք ներկրման լրացուցիչ ուղիներ, այսինքն՝ լրացուցիչ գործընկերներ տարբեր երկներում։ Այս տեսակետից կարևոր է հայկական սփյուռքի ակտիվ դերակատարությունը։ Անհրաժեշտ է գիտակցել, որ մեր բարդ տարածաշրջանում ֆինանսներ ունենալ դեռ չի նշանակում ապահովել անհրաժեշտ ապրանքային պաշարներ»,– ասում է տնտեսագետը՝ ընդգծելով հնարավոր ֆորս–մաժորներից ապահովագրվելու անհրաժեշտությունը, այդ թվում՝ ինքնաթիռների ազգային պարկ ձևավորելու միջոցով։