ԿարևորՀասարակություն

Կորոնավիրուս․ Հայաստանը՝ ցածր ռիսկի գոտում

Առողջապահության համաշխարհային կազմակերպությունը  միջազգային մակարդակի արտակարգ իրավիճակ  է հայտարարել Չինաստանում կորոնավիրուսի բռնկման պատճառով։

Ինչպես նշվում է ԱՀԿ–ի հայտարարության մեջ, կորոնավիրուսի տարածումը կարելի է կանխել, եթե աշխարհի երկրները միջոցառումներ ձեռնարկեն վիրուսի վաղաժամ հայտնաբերման ուղղությամբ, մեկուսացնեն հիվանդներին և հետևեն նրանց կոնտակտներին։

Միաժամանակ` կազմակերպությունը ապրանքի և մարդկանց տեղաշարժման հետ կապված սահմանափակումներ չի առաջարկում։

Վերջին տվյալներով, ՉԺՀ–ում մահացածների թիվը գերազանցել է 210–ը։ Հունվարի 29–ի դրությամբ` գրանցվել է 7711 վարակման դեպք։ Հայաստանում վիրուսի տարածումը կանխարգելող աշխատանքների համակարգման նպատակով երեկ ստեղծվել է միջգերատեսչական հանձնաժողով փոխվարչապետ Տիգրան Ավինյանի գլխավորությամբ։  Վերջինին հանձնարարվել է որոշումն ուժի մեջ մտնելուց հետո՝ եռօրյա ժամկետում, ՀՀ վարչապետին ներկայացնել ամփոփ տեղեկատվություն առկա իրավիճակի և իրականացվող աշխատանքների վերաբերյալ:

Առողջապահության համաշխարհային կազմակերպությունը երեկ, այնուամենայնիվ, որոշեց միջազգային մակարդակի արտակարգ իրավիճակ  հայտարարել Չինաստանում կորոնավիրուսի բռնկման պատճառով։  Առողջապահության համաշխարհային կազմակերպության երևանյան գրասենյակի ղեկավար Եգոր Զայցևը «Ռադիոլուրի» հետ զրույցում նշեց․

 «Որոշումը կայացվել է երեկ։ Հիմքում երեք հիմնական պատճառ կա․ սա բարձր ռիսկայնությամբ արտակարգ իրադարձություն է։ Հանրային առողջության տեսանկյունից սա  մեծ ռիսկ է պարունակում ոչ միայն Չինաստանի համար, որտեղ հայտնաբերվել է կորոնավիրուսը, այլև ամբողջ աշխարհի։ Երրորդ գործոնը՝ իրավիճակի դեմ պայքարելու համար պահանջվում է միջազգային հանրության միասնական արձագանքը։ Անցյալում  նման իրավիճակ գրանցվել է Էբոլա, Վիկա, H1N1 վիրուսների համաճարակի ժամանակ։ Կազմակերպությունը ընդունեց նման որոշում, որպեսզի բոլոր երկրները  աշխատեն համատեղ, գործողությունները համակարգվեն և մարդիկ հնարավորինս քիչ հիվանդանան ու մահանան»։

Համաճարակի կանխարգելման նպատակով` Հայաստանում ստեղծված միջգերատեսչական հանձնաժողովը  առավոտյան գումարել է առաջին նիստը։ ԱԳ  նախարարի տեղակալ Ավետ Ադոնցը նշել է, որ Չինաստանում ՀՀ դեսպանությունը շարունակական կապի մեջ է գտնվում ՀՀ շուրջ 600 քաղաքացիների հետ և իրականացնում է  անհրաժեշտ գործողություններ: Նա նաև նշել է, որ գործընկեր երկրների հետ քննարկվում է Հուբեի նահանգում բնակվող ՀՀ քաղաքացիների կամավոր տարահանման հնարավորությունը: Նիստի ընթացքում քննարկվել է  Չինաստանի հետ մուտքի վիզայի ազատ ռեժիմի ժամանակավոր կասեցման նպատակահարմարությունը: Ավելի ուշ լրագրողների հետ հանդիպմանը առողջապահության նախարար Արսեն Թորոսյանը տեղեկացրեց․

«Քննարկվել է Չինաստանի քաղաքացիների մուտքի սահմանափակումների հարցը»։

Միջգերատեսչական հանձնաժողովի նախագահ  Տիգրան Ավինյանն իր  ֆեյսբուքյան էջում գրել է․  «Հաշվի առնելով կորոնավիրուսով պայմանավորված համաճարակային իրավիճակը՝ 2020թ. փետրվարի 1-ից մինչ մարտի 31-ը Չինաստանի Ժողովրդական Հանրապետության քաղաքացիների համար Հայաստանի Հանրապետություն մուտքի վիզայի գործող ազատ ռեժիմը կասեցվում է»:

Առողջապահության նախարարը  վստահեցնում է՝  99.9 տոկոսով Հայաստանում կորոնավիրուս չկա։  Հայաստանը դեռևս համարվում է ցածր ռիսկի գոտի։ Մեր երկիրը, ինչպես բոլոր երկրները,  ախտորոշիչ թեստերի հետ կապված խնդիր ունի, քանի որ հիվանդությունը նոր է, և թեստերը նոր են մշակվում։

Չինաստանում Հայաստանի դեսպանատան միջոցով ախտորոշիչ թեստերը  կտեղափոխվեն Հայաստան։ Դրանք կիրառվելու են միայն այն մարդկանց համար, որոնց մոտ կորոնավիրուսին բնորոշ ախտանշաններ ի հայտ կգան։

Ցուցադրել ավելի
Back to top button