ԿարևորՀասարակություն

Երեւանի օդում փոշու պարունակությունն ավելացել է 1.5 անգամ

Շրջակա միջավայրի մոնիթորինգի կենտրոնը  մայրաքաղաքում դիտարկումներ է իրականացնում  օդային ավազանում։ Արդյունքները մխիթարական չեն։

Մայրաքաղաքում աղտոտվածությունը բավականին մեծ է։ Կանաչապատման ինչ ծրագրեր է նախատեսում քաղաքային իշխանությունը և ինչպես պետք է վերականգնվեն  անտառածածկ տարածքները:

Երևանում տեղակայված 5 դիտակայանների շուրջօրյա դիտարկումների արդյունքները ցույց են տվել, որ  վերջին երեք ամիսներին մայրաքաղաքում մթնոլորտային օդում փոշու պարունակությունը  նախորդ ամիսների  հետ համեմատ ավելացել է 1.5 անգամ։ 

«Բայց այդ ավելացած կոնցետրացիաները տարվա ընթացքում դիտված կոնցետրացիաներին բնորոշ կոնցետրացիաներ են։ Այսինքն` 2019 թվականի ընթացքում մթնոլորտային օդում  փոշու կոնցետրացիան չի ավելացել, սակայն ունենք սահմանային թույլատրելի կոնցետրացիաներից գերազանցումներ։ Սահմանային  թույլատրելի կոնցետրացիան  150 միկրո գրամ  մետր խորանարդ է, իսկ առավելագույն  դիտված  կոնցետրացիաները երեք- չորս անգամ գերազանցել են»։

Ըստ  շրջակա միջավայրի նախարարության «Շրջակա միջավայրի մոնիթորինգի և տեղեկատվության կենտրոն» ՊՈԱԿ-ի տնօրենի տեղակալ Գայանե Շահնազարյանի՝ մտահոգիչ է  սահմանված թույլատրելի նորմերից  40 տոկոս գերազանցումների թիվը։ Ստացվում է, որ մթնոլորտային օդում  փոշու կոնցետրացիան բավականին մեծ է։ Սակայն տարվա ընթացքում  այն  էականորեն  չի փոխվել։ Մյուս աղտոտիչների՝ ծծմբի  և ազոտի երկօքսիդների մասով  գերազանցումներ չկան։ Եղածներն էլ էպիզոդիկ դեպքեր են, ասում է նախարարության ներկայացուցիչը։

«Քաղաքում համեմատաբար աղտոտված հատվածը Ագաթանգեղոս և Խանջյան խաչմերուկն է, որտեղ դիտակայանում հաճախ ենք ունենում գերազանցումներ»։

Բնապահպան Ինգա Զարաֆյանը կարծում է, որ բերված թվերը չեն արտահայտում այն վտանգը, որն առկա է հանրապետությունում։ Օրինակ է բերում  գաջի  գործարանի  հարևանությամբ ապրողներին, որոնք ամեն օր շնչում են օդն աղտոտող վտանգավոր փոշին։ Բնապահպանը նշում է, որ թեև  չկան ծծմբի  և ազոտի երկօքսիդների մասով  գերազանցումներ, սակայն «Արմենիան մոլիբդեն փրոդաքշնի» հարակից  տարածքներում վտանգավոր արտանետումների էպիզոդները շատ են։

« Դուք մի հատ փորձեք,  երբ արտանետում է լինում, մեկ րոպե այնտեղ  կանգնել»։

Մեր հանրապետությունում չկա  պաշտպանիչ շերտ, որով մարդը կարող է  այդ վատ  աղտոտված  օդը չշնչել։ Կանաչապատ տարածքները Հայաստանում  վաղուց  վերացել են։ Էկոլոգիական վատ վիճակի մասին  բարձրաձայնեց  նաև  ԲՀԿ ավագանու անդամ Հռիփսիմե Առաքելյանը, շեշտեց` 90–ականներին սկսվել է անտառահատումների մեծ ջարդ  և դրանց տեղերը չեն լրացվել։ Նա հույս ունի, որ  քաղաքապետարանի կողմից ստեղծված կանաչապատման ՀՈԱԿ–ը  խնդիրներին որոշակիորեն լուծում կտա։ Առաջինը կսկսվեն Սարալանջի հատվածի անտառածածկման  աշխատանքները։

 «Սկսել է տնկիների ձեռք բերումը և  2020 թվականի Երևանի բյուջեով հաստատեցինք տնկիների ծավալի գումարի չափը և  3.6 մլրդ դրամ գումար  և դա բավականին լուրջ գումար է»։

 «Իմ քայլը» խմբակցության ավագանու անդամ Հասմիկ Խաչունցը նշեց, որ  կազմակերպությունում ընդգրկվել են լավագույն մասնագետները, որոնց  շնորհիվ արդյունքներ կգրանցվեն։

 «Այդ մասնագիտական ուժի շնորհիվ առաջիկա երկու- երեք տարիների ընթացքում  արդեն բարելավում պիտի որ նկատվի»։

Բնապահպանները, սակայն, այդքան լավատես չեն, արձանագրում են, որ կանաչապատման ենթական բոլոր տարածքներն այլեւս սեփականաշնորհված ու կառուցապատված են։

Back to top button