ԿարևորՀասարակություն

Ո՞ր խանութներում են հայտնաբերվել ժամկետանց մթերքներ

Երևանի քաղաքապետարանը ստուգումներ է իրականացրել խանութներում  և արձանագրել խախտումներ։ Կառույցից կոչ են անում ամանորյա եռուզեռի ընթացքում լինել առավել ուշադիր և թերությունների դեպքում ահազանգել  1-05 հեռախոսահամարին։  Ո՞ր խանութներում են  հայտնաբերվել ժամկետանց մթերքներ և ի՞նչ են արվել դրանք:

Երևանի քաղաքապետարանի առևտրի և սպասարկումների վարչության ամբողջ տարվա ընթացքում, իսկ նախատոնական օրերին ուժեղացված ռեժիմով  իրականացրած հսկողության  արդյունքում  մայրաքաղաքի  որոշ խանութներում արձանագրել է ժամկետանց ապրանքներ։  Վարչությունը ստուգումներ է իրականացրել այն խանութներում, որտեղ  մարդկանց հոսքը մեծ է։ Դրանք  հիմնականում  ցանցային  խանութներն են։

«Սիթի», «Նոր Զովք», «Ելակ», «Ծիրան», «ՎԱՍ» սուպերմարկետներում  իրականացրել ենք ստուգումներ։  Կարելի է ասել, որ 90 տոկոսում հայտնաբերվել են թերություններ։  Ժամկետանց սննդամթերքները եղել է երշիկների ու կաթնամթերքի մեջ։ Թերություններ են եղել նաև հիգիենայի պարագաների ու խնամքի միջոցների մեջ»։

Ըստ քաղաքապետարանի առևտրի և սպասարկումների վարչության  պետ Հովիկ Սաֆարյանի, կազմվել են վարչական իրավախախտման վերաբերյալ արձանագրություններ 100-200 հազար դրամ տուգանքով։ Ստուգումները շարունակվում են, վարչության ղեկավարը հորդորում է, որպեսզի սպառողները լինեն առավել ուշադիր, խանութներում գնումներ կատարելիս  ուշադրություն դարձնեն ժամկետներին, իսկ տնտեսվարողները  լինեն բարեխիղճ։ Հայտնաբերված խախտումները  առևտրի և սպասարկումների վարչությունն  ուղարկել  է  Սննդի անվտանգության  տեսչական մարմին։

«Ռադիոլուրը» փորձեց  կառույցից  ստանալ պատասխան, թե ինչ աշխատանքներ են  տարել  հայտնաբերված խախտումները  վերացնելու  ուղղությամբ, սակայն ասացին, որ  աշխատակիցները ստուգայցների են  և չեն կարող հիմա պատասխանել։  Քաղաքապետարանի պաշտոնյան  տեղեկացնում է, որ առևտրի, հանրային սննդի և կենցաղային ծառայության օբյեկտներում հսկողությունը կրելու է մշտական բնույթ և իրավախախտում կատարած անձինք ենթարկվելու են պատասխանատվության

2019 թվականին քաղաքապետարանի իրականացրած ստուգայցերի ընթացքում   հայտնաբերվել են ժամկետանց ապրանքների իրացման 77 դեպք։ Սննդագետ Դավիթ Պիպոյանն իր հերթին  հորդորում է հատկապես ամանորյա  ակտիվ գնումների ընթացքում առավել ուշադիր լինել մակնշումների ու  պիտանելիության ժամկետների նկատմամբ, քանի որ խանութներում գոյացած հերթերի արդյունքում մարդիկ չեն կարողանում հետևել  դրանց։

«Պետք է սպառողները  զգույշ լինեն և հետևեն ապրանքների մակնշումներին, ապրանքները գնեն այն ժամկետի համար, երբ պետք է օգտագործեն»։

Ուշադիր պետք է լինել բոլոր ապրանքների  պիտանելիության ժամկետների, առավել ուշադիր` կենդանական ծագում ունեցող  սննդի նկատմամբ, Դրանք  բարձր ռիսկայնություն ունեցող մթերքներ են և պիտանելիության   ժամկետի ավարտը  հանրային առողջապահական խնդիրների  և  թունավորման պատճառ կարող է լինել, ասում է սննդագետ զրուցակիցս։  

«Եթե, օրինակ, կոնֆետի մեջ պիտանելիության ժամկետն անցնելուց նրա էսթետիկական տեսքն է վատանում  կամ համային հատկանիշները և հետո  չի օգտագործվում այդ ապրանքը, ապա  կենդանական  ծագում ունեցող  մթերքների դեպքում թունավորման ռիսկը մեծ է»։   

Մարդկանց մեծ մասն ամանորյա գնումները կատարում է  դեկտեմբերի 20-ից հետո,  իսկ այդ ընթացքում  ավելանում են  նաև այն տնտեսվարողները, որոնք փորձում են մինչև տարեվերջ  ազատվել   ապրանքներից։ Սննդագետը խորհուրդ է տալիս գնումները կատարել  այն ժամերին, երբ հերթեր չկան։

Ցուցադրել ավելի
Back to top button