ԿարևորՄշակույթ

Նորամուտ՝ Հայաստանի մշակութային և սպորտային քաղաքում

Գյումրիում օրը տոնական էր մշակույթի և սպորտի ներկայացուցիչների համար: Հայաստանի մշակութային և սպորտային քաղաքում նորամուտ են տոնել Գյումրիի «Անի»  փողային նվագախումբն ու ազատ ոճի ըմբշամարտի մանկապատանեկան մարզադպրոցը: 2020-ին ևս Գյումրիում դռները կբացեն մշակույթի և սպորտի օջախներ:

Գյումրիում թե՛ համաքաղաքային միջոցառման, թե՛ փողոցի, կամ՝ որևէ կառույցի բացումն ավանդույթի համաձայն ազդարարում է Գյումրիի «Անի» փողային նվագախումբը:  Այս անգամ փողայինի կատարումը նվիրված  է  իրենց նոր հասցեի բացմանը: 30 տարի անհարմարություններ հաղթահարելով տեղակայվել են տարբեր հասցեներում, վերջապես ունեցան իրենցը:

Քաղաքապետի խորհրդական Հասմիկ Կիրակոսյանը, ով երկար տարիներ ղեկավարել է մարզի մշակույթը հիշում է, թե ինչպես երկրաշարժից հետո փլատակների տակից դուրս բերած ծռմռված գործիքներով, ցնցոտիներով ու պարտքով վերցրած հագուստով մեկնել են Ֆրանսիա՝ մասնակցել միջազգային հեղինակավոր մրցույթի ու պատվով վերադարձել:

Գյումրիի փողայինն իր ելույթը պատվով են կատարում առանց մեծ սպասելիքների:

Հասմիկ Կիրակոսյան․ «Պատվոգրերը դրված են, ես ասում եմ, գոնե մի պատվոգիր մեզ  տան, տանենք լենինականցիների փոքր բերանները փակենք: Ու  հանկարծ.  վերջացան պատվոգրերը, վերջացան բոլոր տեսակի գավաթները, մնաց միայն գրանպրին՝ մեծ մրցանակը: Մենք կանգնած ենք ապշած ենք բոլորս ու հանկարծ… ձայնը տրվում է ժյուրիի նախագահին և իրենց ֆրանսերեն ակցենտով հայտարարում է «Գղան պղի, Առմենիա, դե լա Լենինական»: Դուք պատկերացնում եք մեր հուզմունքը, մենք բոլորս լաց էինք լինում: Վերջում այնպես եղավ, որ Մարսյան դաշտում չափ տվեց Մարսելիեզը մեր Ժորան և նա իր փայտիկով ենթարկեց Հայաստանին, Լենինականին 25 երկրների փողային նվագախմբերը»:  

Հասմիկ Կիրակոսյանն իր հետ բերել էր այդ գրան պրին, ինչը նոր շենքի առաջին զարդը դարձավ, և արդեն ներսում տղաները հնչեցրին նույն կատարումը ինչը առիթ էր դարձել դեռ անկախությունը չվավերացրած  Հայաստանի եռագույնը առաջին անգամ ծածանելու միջազգային ասպարեզում:

Հայաստանի մշակույթի ու սպորտի մայարքաղաքի հաջորդ նորամուտը ազատ ոճի ըբշամարտի մանկապատանեկան դպրոցինն է: 8-23 տարեկան շուրջ 220 մարզիկ ունեցող դպրոցը վերջապես պայմաններ ունեցավ մարզումներ կազմակերպելու համար:

Ֆրանսիայի Քրեթեյ և Գյումրի քաղաքներն արդեն 20 տարի քույր քաղաքներ են, Քաղաքի սրտում պատմական շենքերից մեկում, որտեղ գործում է մարզադպրոցը, հիմնանորոգման  համար 27 մլն դրամի ֆինանսավորման 70 տոկոս Քրեթեյինն է. 30-ը՝ Գյումրիինը:

2020թ-ը օլիմպիական տարի է Գյումրիի քաղաքապետը սպասելիքներ ունի:

Գյումրիի քաղաքապետ Սամվել Բալասանյան․ «Մեծ-մեծ չխոսենք, որպես գյումրեցիներ, բայց՝ ոնց որ թե ակնկալիքներ ունենք, որովհետև ռեյտինգով ոնց որ թե օլիմպիական մասնակիցներ ունենք: Ճիշտն ասած գույնը ինձ չի հետաքրքրում այդքան, ինչքան որևէ տեղ գրավելը»:

Սամվել Բալասանյանն ավելացնում է 2020 –ին Գյումրիում սպորտային ու մշակութային օջախների նորամուտներ են նշվելու:

Ցուցադրել ավելի
Back to top button