Երեկ Կ. Դերմիրճյանի անվան մարզահամերգային համալիրում տեղի ունեցավ «Դասական Ջեքսոն» (The Classical Jackson) համերգը։ Համերգային այս նախագիծը ներկայացնում է փոփի արքա Մայքլ Ջեքսոնի հիթերը նվագախմբային նոր գիրծիքավորմամբ եւ Հայաստանի պետական սիմֆոնիկ նվագախմբի‚ երգչախմբի‚ բեք վոկալի‚ DJ-ի կատարմամբ։ Համերգին յուրահատուկ հետաքրքրություն հաղորդեցին տերմենվոքս երաժշտական գործիքի օգտագործումն ու լուսային էֆեկտները։
Հետաքրքրական էր, որ Փոփի արքայի երգերից մեկը ներկայացվեց հայկական դուդուկով։
«Ընտրությունը կատարվել է հետեւյալ սկզբունքով. ընտրվել են այն ստեղծագործությունները‚ որոնք կարող են լավագույնս հնչել սիմֆոնիկ նվագախմբի կատարմամբ։ Առանձնացրել ենք նաև այն երգերը‚ որոնք դրսում այնքան էլ շատ չեն գործիքավորվել սիմֆոնիկ նվագախմբի համար։ Ջեքսոնի երկրպագուները‚ որոնք հազարավոր անգամներ լսել են նրա երգերը‚ մեր համերգին գալով՝ դրանք կունկնդրեն նոր հնչողությամբ»,– ասել է Հայաստանի պետական սիմֆոնիկ նվագախմբի Սերգեյ Սմբատյանը։
Հայաստանի պետական սիմֆոնիկ նվագախմբի կատարմամբ հնչեցին «You Are Not Alone», «Black Or White», «They Don’t Care About Us», «Remember The Time» եւ այլ ստեղծագործություններ։ Գործիքավորումը կոմպոզիտոր Մարտին Ուլիխանյանինն էր։