Կոռուպցիայի կանխարգելման հանձնաժողովը կոռուպցիայի դեմ պայքարող մարմին չէ, պայքարը իրավապահների գործն է, հանձնաժողովի հիմնական անելիքը հայտարարագրերի ուսումնասիրությունն ու վերլուծությունն է՝ «Ռադիոլուրի հյուրասրահում» ասել է հանձնաժողովի նորընտիր անդամ Էդգար Շաթիրյանը ։
Խորհրդարանը փակ գաղտնի քվեարկությամբ նոյեմբերի 19-ին ընտրել է նոր կառույցի առաջին 5 անդամներին: Նրանց առաջադրել էին կառավարությունը, Բարձրագույն դատական խորհուրդը և ԱԺ երեք խմբակցությունները։
Էդգար Շաթիրյանի թեկնածությունն առաջադրել էր խորհրդարանական մեծամասնությունը։ Նա նորընտիր կազմում միակն է, որ եղել է Բարձրաստիճան պաշտոնատար անձանց էթիկայի հանձնաժողովի անդամ: Հանձնաժողովը փոխարինելու է Բարձրաստիճան պաշտոնատար անձանց էթիկայի հանձնաժողովին:
«Հայտարարագիր չներկայացնելու, կեղծ տվյալներ ներկայացնելու կամ տվյալները թաքցնելու համար 2017-2019թթ․հարուցվել և իրականացվել է շուրջ 1000 վարույթ: Դրանց մի մասը կարճվել է, հայտարարատուների մյուս մասն էլ նախազգուշացվել կամ տուգանվել է», — ասել է հանձնաժողովի նորընտիր անդամը։
Նրա տեղեկացմամբ՝ ապօրինի հարստացման հոդվածով քրեական հետապնդում է իրականացվում 5 անձի նկատմամբ։ Դատավճիռներ առայժմ չկան։
Ինչո՞ւ է դժվար հիմնավորել ապօրինի հարստացումը, ի՞նչն է խանգարում հանձնաժողովին ու որո՞նք են լինելու նոր գործողությունները․ հարցերի պատասխանները՝ հարցազրույցում։
