Ազգային ժողովում հաջորդ տարվա բյուջեն ներկայացնելիս բարձր տեխնոլոգիական արդյունաբերության նախարար Հակոբ Արշակյանը նշեց, որ նախարարությանը տրվող 12,5 միլիարդ դրամից 6,3 միլիարդն ուղղվելու է ռազմարդյունաբերության ոլորտին։
«2020 թվականի բյուջետային հատկացումները ռազմարդյունաբերության ոլորտում ավելացվել են շուրջ 122 տոկոսով՝ հասնելով շուրջ 6,3 միլիարդ դրամի»,- ասաց նախարարը։
Այդ ծախսերի մի մասը, ըստ նախարարի, ուղղվելու է գիտահետազոտական-փորձակոնստրուկտորական աշխատանքներին, մյուս մասը՝ արտադրական կարողությունների զարգացմանը՝ հայկական ռազմարդյունաբերական արտադրանքը արտաքին շուկաներ հանելու նպատակադրվածությամբ։
«Նախարարությունը 2020 թվականին նախատեսել է թվով շուրջ 90 դրամաշնորհներով աջակցել տեխնոլոգիական ոլորտի նորարարական խմբերին և ստարտափներին՝ իրենց գաղափարները պրոդուկտների նախատիպի, այնուհետև նաև բիզնեսի վերածելու նպատակով՝մոտ 1 մլրդ դրամ»,- ԱԺ –ում 2020 թ –ի բյուջեի քննարկման ժամանակ նշեց նախարար Հակոբ Արշակյանը։
Նախարարությունը մտադիր է նաև հանրապետությունը ցանկալի վայր դարձնել կյանքի համար, ինժեներների, ծրագրավորողների եւ նորարարների աշխատանքի համար։ Այդ ծրագրերի շարունակական լինելու համար նախարարությունը նաև ներդրումային ծրագրերին է աջակցելու՝ դեպի մարզեր ուղղելով այդ ֆինանսավորումը, որ կլինի ևս մոտ 1 միլիարդ դրամ։
Նախարարի խոսքով, մշակվել է 2020-2025 թվականների ռազմավարությունը, որն ուղղված է բարձր տեխնոլոգիաների, ռազմարդյունաբերության եւ թվայնացման զարգացմանը:
«Այն շուտով կհանձնվի հանրության դատին»,- նշեց Արշակյանը: