Կողբավան համայնքը կապահովվի խմելու ջրով. Կողբավանում խմելաջրի համակարգ երբևէ չի եղել:
Համայնքների տնտեսական և սոցիալական զարգացմանն ուղղված ՀՀ կառավարության 2019 թվականի սուբվենցիոն ծրագրերի շրջանակում Կողբավան համայնքում շարունակվում են խմելու ջրի խորքային հորի հորատման, հոսանքագծի և ջրագծի կառուցման աշխատանքները՝ հայտնում է Արմավիրի մարզպետարանի ֆեյսբուքյան էջը:
Ծրագրի նախագծանախահաշվային արժեքը 78 մլն 055.7 հազար դրամ է, որից ՀՀ պետական բյուջեից տրամադրվող սուբվենցիայի չափաբաժինը կազմում է 46 մլն 833.43 հազար դրամ (60%), իսկ համայնքի մասնակցությունը` 31 մլն 222.3 հազար դրամ (40%):
Ծրագրով նախատեսված է սահմանային երեք աղբյուրների ջրերի հավաքում մեկ ընդհանուր ջրընդունիչ ավազանի մեջ և մղիչ պոմի միջոցով 1430 մ պողպատյա ջրագծով ջրի մղում համայնքի պահանջվող կետ: Այս կետում նախատեսվում է կառուցել երկու 12 խմ տարողությամբ ՕԿՋ, որտեղից ջուրը 90 մմ տրամագծի պոլիէթիլենե խողովակներով 3677 մ երկարությամբ ջրագծով կհասցվի Կողբավան համայնք:
Ծրագիրն ունի կենսական նշանակություն, որի իրականացմամբ ամբողջությամբ լուծվում է Թուրքիայի սահմանից 2.5 կմ հեռավորության վրա գտնվող Կողբավան համայնքի խմելու ջրի` տարիներ շարունակ անլուծելի թվացող խնդիրը:
Ծրագրի շահառու է հանդիսանում համայնքի 182 բնակիչ:
