Աննա Նազարյան
«Ռադիոլուր»
«Ենոքավանի հանրապետություն» հաղորդման հեղինակ Արտակ Չիբուխչյանը համոզված է, որ տեղեկատվական տեխնոլոգիաների զարգացումը մարդկանց ստեղծագործելու հնարավորություն է տալիս:
«WCIT-ի ժամանակ հետաքրքիր հարց հնչեց. տեխնոլոգիաները զարգանում են, մեկ ռոբոտը 1000 մարդու փոխարեն է աշխատում: Ինչի՞ է դա հանգեցնելու, ի՞նչ պետք է անել: Իրականում բոլորին պետք է ապահովել, այնպես անել, որ մարդը սնվելու, կրթվելու, առողջության մասին հոգալու խնդիր չունենա: Այդ ժամանակ մարդը կսկսի մտածել, նոր բանով զբաղվել ու նոր բան հնարել: Սևագործ բանվորի գործը տեխնոլոգիաները կարող են անել, իսկ ազատ ժամանակը մարդը կարող է տրամադրել հարևանի, ընկերների հետ շփվելուն և մտածելուն, թե ինչով կարող է զբաղվել: Արդյունքում՝ նոր բան կհնարի: Ստացվում է, որ ՏՏ-ն եկել է օգնելու մարդուն, որ նոր բան հնարի»,- ասում է Չիբուխչյանը:
Նրա համոզմամբ՝ ինչպես ամեն նոր բան, այնպես էլ ՏՏ ոլորտի զարգացումը, իր հետ նոր մարտահրավերներ է բերում, բայց նորամուծություններից պետք է նաև լավը վերցնել: Չիբուխչյանը հորդորում է մտածել այն մասին, թե ինչ կլիներ, եթե այսօր էլ մարդիկ պատերազմեին, ինչպես Վարդան Մամիկոնյանի ժամանակ:
