«Լիդիանի» հայցը դատարանը բավարարել է. կբողոքարկվի՞, թե՞ ոչ
Հասմիկ Դիլանյան
«Ռադիոլուր»
«Երբ տեսչական մարմնի ղեկավար էի, դատարան միջնորդություն ներկայացրեցինք՝ խնդրելով, որպեսզի հետաձգի գործի քննությունը, այդ ընթացքում մենք լրացուցիչ ապացույցներ, փաստարկներ պետք է ներկայացնեինք ու պատրաստվեինք դատաքննությանը»,- «Ռադիոլուրի» հետ զրույցում բնապահպանության և ընդերքի տեսչական մարմնի արդեն նախկին ղեկավար Արթուր Գրիգորյանն այսպես է արձագանքել վարչական դատարանի վճռին:
Գրիգորյանը որոշել էր «Լիդիան Արմենիա» ընկերությանը թույլ չտալ Ամուլսարի տարածքում հանքարդյունաբերական գործունեություն ծավալել:
Եվ ահա օրերս ՀՀ վարչական դատարանն անվավեր է ճանաչել տեսչության 2018թ. օգոստոսի 27-ի որոշումը: Գրիգորյանն ասել է, որ կային շատ կոնկրետ փաստարկներ, որոնք իրենք պետք է ամփոփեին ու ներկայացնեին:
Բնապահպանության և ընդերքի տեսչական մարմինը դեռ չգիտի՝ բողոքարկե՞լ դատավճիռը, թե՞ ոչ:
ՀՀ վարչական դատարանն անվավեր է ճանաչել ՀՀ բնապահպանության և ընդերքի տեսչական մարմնի՝ Ամուլսարում Լիդիանի որոշակի գործողություններ կատարելուց ձեռնպահ մնալու որոշումը: Տեսչական մարմնի արդեն նախկին ղեկավար Արթուր Գրիգորյանը «Ռադիոլուրին» փոխանցեց՝ «տեսչական մարմինը ընկերության ղեկավարին հանձնարարական է տվել, որ ձեռնպահ մնան ընդերք օգտագործման հետ կապված գործողություններից՝ հաշվի առնելով նոր էկոլոգիական գործոնի առկայությունը»:
«Նոր էկոլոգիական հանգամանքները» Ամուլսարի տարածքում Կարմիր գրքում գրանցված «Ոզնաթուփ մեխակի» և «Ապոլլոն» թիթեռի բնակատեղի լինելն էր: Ավելի վաղ՝ շրջակա միջավայրի նախարար Էրիկ Գրիգորյանը հայտարարել էր, որ «Ապոլլոն» թիթեռի համար Ամուլսարի տարածքը բնակավայր չէ, իսկ հայտնաբերված բույսն էլ «Ոզնաթուփ մեխակ» չէ.
«Բացի դրանից այլ եզրակացություններ տրվել ՝ խոնավությունը նույնպես բավարար չէ թիթեռի ապրելու համար»:
ՀՀ վարչական դատարանը եզրահանգել է, որ ենթադրյալ էկոլոգիական հանգամանքները չեն հիմնավորվել անկախ փորձաքննությունից հետո: Մինչդեռ Գրիգորյանը պնդում է՝ իրենք սկսել էին հավաքել փաստերը:
«Երբ դեռ ես էի տեսչական մարմնի ղեկավարը դատարան միջնորդություն ներկայացրեցինք՝ խնդրելով, որպեսզի հետաձգի գործի քննությունը, որպեսզի մենք լրացուցիչ ապացույցներ, փաստարկներ ներկայացնենք ու պատրաստվենք դատաքննությանը: Կային շատ կոնկրետ փաստարկներ, որոնք մենք պետք է ամփոփեինք ու ներկայացնեինք: Դատարանը միջնորդությունը բավարարել էր: Երկարաձգել էր պատասխան ներկայացնելու ժամկետը: Այդ ընթացքում ինձ ազատեցին աշխատանքից: Հիմա ես վճռում կարդում եմ, որ ոչ միայն տեսչության ներկայացուցիչը երբևէ չի մասնակցել նիստերին, այլ անգամ պատասխանը չեն ներկայացրել: Փաստարկները գտնվում էին պատրաստման փուլում: Կային բազմաթիվ լրացուցիչ փաստեր, որ մենք պետք է ներկայացնեինք»:
Դատարանն արձանագրել է, որ Արթուր Գրիգորյանը մինչև տեսչական մարմնի ղեկավարի պաշտոնը ստանձնելն ակտիվորեն հանդես է եկել Ամուլսարի ծրագրի դեմ, ինչը հիմնավոր կասկած կարող է հարուցել՝ կապված նրա անկողմնակալության հետ: Դատարանը գտնում է, որ այս պարագայում Արթուր Գրիգորյանը պարտավոր էր ինքնաբացարկ հայտնել, ինչը և չի արել: Արթուր Գրիգորյանը սա չի հասկանում.
«Ինչ է նշանակում, որ տեսչության ղեկավարը շահագրգռվածություն ուներ, քանի որ նախկինում նրա գործունեությունը միտված էր եղել Ամուսլարի հանքավայրի շահագործման դեմ: Տեսչության ղեկավարի գործունեությունը միտված է եղել բազմաթիվ բնապահպանական հարցերում տնտեսվարողների գործունեության դեմ: Դա նշանակում է, որ տեսչական մարմնի ղեկավարը չէր կարող այդ պաշտոնում նշանակվել»:
Բնապահպանության և ընդերքի տեսչական մարմնից «Ռադիոլուր»-ին փոխանցեցին, որ վճիռը բողոքարկելու համար մեկ ամիս ժամանակ ունեն: Այս ընթացքում կորոշեն՝ բողոքարկե՞լ այն, թե՞ ոչ: