Հասմիկ Դիլանյան
«Ռադիոլուր»-Արագածոտնի մարզ
«Իմ քայլը հանուն Արագածոտնի մարզի». հերթական ներդրումային համաժողովը այս մարզում է այսօր անցկացվում: Մարզում են կառավարության անդամները վարչապետի գլխավորությամբ: Արագածոտնի մարզպետ Դավիթ Գևորգյանը բացման իր խոսքում ոչ թե մարզի ներուժի մասին է խոսել, այլ՝ հիշել է անցյալ տարի տեղի ունեցած հեղափոխության մասին: Մարզի ղեկավարը նաև տնտեսական հեղափոխությունից է խոսել։
«Հայաստանն այս տարին կփակի մոտ 7 տոկոս տնտեսական աճով»,- այդ մասին այսօր՝ «Իմ քայլը հանուն Արագածոտնի մարզի» ներդրումային համաժողովի բացման ժամանակ հայտարարել է վարչապետ Նիկոլ Փաշինյանը:
Նրա խոսքով, սա բարձր ցուցանիշ է ԵԱՏՄ ու եվրոպական երկրների տնտեսական ցուցանիշերում, յոթ տոկոսը, այն արդյունքը չէ, որից կարելի է երջանիկ լինել:
Փաշինյանը նշել է, որ այս տարին առաջին ամբողջական տարին է, որտեղ տնտեսական իրավիճակի ամբողջական քաղաքական պատասխանատուն իրենց կառավարությունն է:
«Այս տարի մենք ըստ ամենայնի կունենանք մոտ 7% տնտեսական աճ, ինչը չափազանց կարևոր է, և բավական բարձր ցուցանիշ է ԵԱՏՄ տարածքում, և ընդհանրապես ամբողջ եվրոպական տարածքում: Այս տարվա տնտեսական ցուցանիշները ցույց են տալիս, որ այն տնտեսական ամբիցիաները, որ մենք ունենք և ձևակերպել ենք, դրանք իրական են, և կարող են դառնալ իրականություն: Այս մասին եկավ վկայելու նաև եվրոբոնդերի նոր թողարկման հաջողությունը, որը Հայաստանի միջազգային տնտեսական իմիջի առումով չափազանց կարևոր էր: ՀՀ-ում այս տարի դեկտեմբերի 31-ի դրությամբ երրորդ հանրապետության պատմության մեջ կունենանք միջազգային պահուստների ամենաբարձր ցուցանիշը: Սա կարևոր արդյունք է, որը վկայում է մեր երկրի ֆինանսական կայունության մասին: Այս տարի Հայաստանի շուկայում առաջին երեք եռամսյակների տվյալներով կենտրոնական բանկը իրականացրել է շուրջ 433 մլն դոլարի գնում»,- ասաց Փաշինյանը:
Տնտեսական հեղափոխության մեջ մեր թիվ մեկ դաշնակիցը ՀՀ գործարարներն են,-«ԻՄ քայլը հանուն Արագածոտնի մարզի» ներդրումային համաժողովի ընթացքում հայտարարել է վարչապետ Նիկոլ Փաշինյանը: Նրա խոսքով, գործարարների շրջանում իրենք թշնամիներ չունեն: «Կառավարության համար կարևոր է մեգանախագծեր իրականացնել»,- ասել է վարչապետը:
Բացի այդ, Նիկոլ Փաշինյանը մեկ անգամ ևս հայտարարել է, որ այս տարի երրորդ հանարապետության պատմության մեջ միջազգային պահուստների ամենաբարձր ցուցանիշն է արձանագրվելու:
«Սա վկայում է մեր երկրի ֆինանսական կայունության մասին»,- հայտարարել է կառավարության ղեկավարը: