Լիլիթ Մուրադյան
«Ռադիոլուր»
Հանրային ռադիոյի էստրադային սիմֆոնիկ նվագախմբի մենակատար Լուսինե Կչոզյանը վերջերս նոր տեսահոլովակ է ներկայացրել: Խոսքերի հեղինակը Լիլիթ Դամիրյանն է, երաժշտության հեղինակը՝ Ալբերտ Աբգարյանը:
Սա երգչուհու առաջին տեսահոլովակն է, սակայն նրա երաժշտական կարիերան ավելի քան երկու տասնամյակի պատմություն ունի: Լուսինեն արդեն 21 տարի երգում է էստրադային սիմֆոնիկ նվագախմբում, 11 տարի դասավանդում է Երեւանի պետական կոնսերվատորիայում:
Ասում է, որ շատ է սպասել այս օրվան, ուրախ է լավ արձագանքի համար:
Լուսինեին հանդիպեցինք Հանրային ռադիոյի բակում կազմակերպված «Կոմիտաս 150 տարի /րոպե» եռասկավառակ ալբոմի շնորհանդեսին:
Զրույցի ընթացքում պարզվեց, որ Բուլղարիայի մայրաքաղաք Սոֆիայում կայացած միջազգային փառատոնին մեր գործընկերը ստացել է միանգամից երեք մրցանակ՝ երկու առաջին եւ մեկ գլխավոր մրցանակ՝ Գրան Պրի:
«Առաջին մրցանակներից մեկը էստրադային մշակմամբ ֆոլկլորային երաժշտության համար էր, մյուսը՝ համաշխարհային հիթ երաժշտության, իսկ SOFIA GRAND PRIX 2019-ը ստացել եմ ջազ նոմինացիայում՝ կատարելով Մարտին Վարդազարյանի «Տեմպրիդ» մեղեդին»,- մեզ հետ զրույցում պատմեց Լուսինե Կչոզյանը:
Հարցին, թե ինչպիսին էին զգացողությունները հաղթանակից հետո, երգչուհին պատասխանեց. «Հուզմունք եւ մեծ ուրախություն»:
Ի դեպ, վոկալ մրցույթին մասնակցելու որոշումը եղել է հենց Լուսինեինը:
SOFIA GRAND PRIX 2019-ը երգի միջազգային մրցույթ-փառատոն է, որին մասնակցել են կատարողներ Սերբիայից, Ուկրաինայից, Հայաստանից, Բելգիայից եւ այլ երկրներից: