Հանրային ռադիոն Կոմիտասի 150-ամյակին նվիրված ներկայացրել է Կոմիտաս 150 տարի/րոպե եռասկավառակ ալբոմը: Ալբոմում ընդգրկված է 150 րոպե ընդհանուր տևողությամբ 53 կատարում՝ ակադեմիական տարբերակներից մինչև ժամանակակից մշակումներ:
«Տարին կոմիտասյան է, ու Հանրային Ռադիոն անմասն չի մնում։ Լեգենդար 6-րդ ստուդիան, որ երկար ժամանակ չէր աշխատում, վերագործարկվել է, որտեղ էլ մենք ձայնագրել ենք 9 ժամ կոմիտասյան ստեղծագործություններից։ Սակայն ծաղկաքաղ ենք արել և ընտրել ենք խորհրդանշանական 150 րոպե, ու այն ներկայացրել ենք ձայնասկավառակում»,- ասաց Հանրային Ռադիոյի գործադիր տնօրեն Գարեգին Խումարյանը:
Ձայնասկավառակը թողարկվել է սահմանափակ տպաքանակով և վաճառքի ենթական չէ: Կատարումները ձայնագրվել և մշակվել են Հանրային ռադիոյի ստուդիայում: Ձայնասկավառակի օրինակները տրամադրելու են երաժշտական գրադարաններին, կրթօջախներին ու ձայնադարաններին:
«Դիզայների հետ որոշեցինք ընտրել Կոմիտասի ավելի քաղաքացիական կերպարը, որն ավելի խրոխտ է։ Երեք ձայնասկավառակ է պատրաստված, որոնք սիմվոլները ունեն՝ Եկեղեցին, Կռունկը, Ծիրանին։ Ձայնասկավառակների հետ կա փոքրիկ տեղեկատվական գրքույկ, որպեսզի մարդիկ տեղեկանան, թե ինչ ստեղծագործություններ են լսում»,- ասաց նախագծի երաժշտական պրոդյուսեր Էդգար Ամիրխանյանը:
