Հասմիկ Դիլանյան
«Ռադիոլուր»
«Տնտեսական հեղափոխությունը մենախոսություն չէ, այլ՝ երկխոսություն»,- այսօր Երևանում մեկնարկած «Տնտեսական հեղափոխություն, ինչ անել» խորագրով խորհրդաժողովի ժամանակ հայտարարել է վարչապետ Նիկոլ Փաշինյանը: Վարչապետը որպես օրինակ բերել է անկախության օրը Գյումրիում նշելու կառավարության նախաձեռնությունը: Հակառակ նրան, որ Գյումրիի ռեստորաններն ու սրճարանները լեփ-լեցուն էին, միևնույնն է, տպվել են նախորդ օրերի քանակին համապատասխան ՀԴՄ կտրոններ: Վարչապետը նաև հայտարարել է, որ հաջորդ ամռանը գուցե Համահայկական բիզնես ֆորում անցկացվի: Սա էլ տնտեսությունն աշխուժացնելու նպատակով է:
Տնտեսությունը տեղափոխել որակապես նոր մակարդակի. տնտեսագետ փորձագետները տնտեսական հեղափոխությունն այսպես են բնորոշում:
«Ցավոք, դեռևս իրականցվող քայլերը բավարար հիմք չեն տալիս արձանագրելու, որ իրականում մենք ի վիճակը ենք լինելու տնտեսությունը նոր մակարդակի փոխել: Թստ էության՝ բոլոր ոլորտներում քննարկումները, դիտարկումները ցույց են տալիս, որ զարգացումները դեռևս իներցիոն են»,- «Ռադիոլուրի» հետ զրույցում ասա ԵՊՀ կառավարման ու գործարարության ամբիոնի վարիչ Կառլեն Խաչատրյանը:
ԵՊՀ տնտեսագիտության և կառավարման ֆակուլտետի դեկան Հայկ Սարգսյանը «Ռադիոլուրի» հետ զրույցում հակառակն է պնդում՝ տնտեսական հեղափոխության հիմքերը դրված են: Որպես հիմք հիշեցնում է ԵԱՏՄ գագաթաժողովի ու WCIT համաժողովի անցկացումը Երևանում. «Տնտեսական հեղափոխության սկիզբը արդեն հռչակվել է, մնում է գործուն միջոցներ ունենանք այդ հեղափոխությունը կյանքի կոչելու հարցում»:
Տնտեսական մոդելի փոփոխությանը զուգահեռ պայքարել ստվերի դեմ. սա տնտեսական հեղափոխության հաջողություններից մեկն է: «Տնտեսական հեղափոխություն, ինչ անել» խորհրդաժողովում այսօր հայտարարվեց՝ Հայաստանում հատկապես ստվերի դեմ պայքարում հաջողություններն ակնհայտ են: Սա փաստեց Գործարարների և արդյունաբերողների միության նախագահ Արսեն Ղազարյանը՝ որպես պրակտիկ գործարար:
Ղազարյանի հայտարարությանն արձագանքեց վարչապետ Նիկոլ Փաշինյանն արդեն՝ վկայակոչելով ԱՄՀ տվյալները՝ վերջին զեկույցներից մեկում միջազգային այս կառույցն արձանագրել էր, որ եթե հարկեր/ՀՆԱ հարաբերակցությունը տարեկան 0,3 տոկոս շարժ ունենա, արդեն լավագույն հաջողությունն է Հայաստանի համար:
«Այսօրվա վիճակով ՀՀ-ում հարկեր/ՀՆԱ ցուցանիշը բարելավել ենք մոտավորապես 1.2 տոկոսով: Այսինքն ԱՄՀ –ի լավագույն ռեկամենդացիաներից գերազանցել ենք 4 անգամ: Ակնհայտ փաստեր կան, որ մենք ստվերի կրճատման հետ կապված աննախադեպ իրավիճակ ունենք»:
Վարքագծային բաղադրիչում լուրերը հուսադրող չեն: Փաշինյանն իր համար ցավալի օրինակ մեջբերեց: Սեպտեմբերի 21-ին Գյումրին հյուրընկալել էր 15 հազար մարդ: Այդ օրը Գյումրիի ռեստորաններն ու սրճարանները լեփ-լեցուն էին:
«Ինձ համար հետաքրքիր էր, թե սեպտեմբերի 21-ին Գյումրիում առևտուրը ինչ շարժ է արձանագրել: Անսպասելի էր, որ ՀԴՄ կտրոնները քանակով նույնքան են տվել, որքան նախորդ օրերին։ Առևտրի ծավալն ընդամենը 10 մլն դրամով էր ավելացել»:
Կառավարության ղեկավարն արձանագրեց՝ Գյումրիի բիզնեսի համար կառավարությունն աննախադեպ հնարավորություն էր ստեղծել: Դա նկատելի է մինչ օրս:
«Բայց բիզնեսը իր կողմից կես քայլ պե՞տք է անի, թե՞ ոչ: Գործընկերության տրամաբանությունը շատ կարևոր է: Չի կարող տնտեսական հեղափոխությունը մենախոսություն լինել, դա պետք է երկխոսություն լինի: Դա նույնն է, որ Գյումրիից քայլում էինք, ոչ մի արձագանք չլիներ, կգնայինք տուն»:
Տնտեսագետ Վահագն Խաչատրյանը նույնպես կարևորում է մտածողության ու գաղափարների փոփոխությունը: Սա նաև կառավարության ներկայացուցիչներին է վերաբերում: