Աիդա Ավետիսյան
«Ռադիոլուր»
«Բարձրագույն կրթության և գիտության մասին» օրենքի նախագծում բավականին փոփոխություններ են եղել, սակայն այն դեռևս սաղմնային վիճակում է:
Օրենքի նախագիծը, ըստ ԱԺ գիտության, կրթության, սփյուռքի, երիտասարդության և սպորտի հարցերի մշտական հանձնաժողովի փոխնախագահ Հովհաննես Հովհաննիսյանի, զերծ չէ թերություններից, այդ իսկ պատճառով ուղարկվել է շահագիգիռ կողմերին՝ բուհերին, գիտական հաստատություններին, որպեսզի իրենց կարծիքները ևս դրվեն քննարկման:
Փոփոխություններից մեկը ուսանողներին դասախոսների ընտրության հնարավորություն ընձեռելն է:
Հովհաննես Հովհաննիսյանը ներկայացնում է մեխանիզմը. ուսանողին առաջարկվում է ընտրել առարկաները: Օրինակ՝ հումանիտար 7 առարկաներից նա կարող է ընտրել 3-ը: Եվ ուսանողներն իրենց դժգոհությունները կարող են ներկայացնել սոցցանցերում և կատարել օնլայն գնահատում, ինչի արդյունքում որոշվում է դասախոսի վարկանիշը, նաեւ նրա դասախոսական հետագա աշխատանքը։
«Սա կիրառվում է աշխարհի շատ երկրներում և սա բնական զտման գործընթաց է: Այստեղ անձնական խնդիր չկա»,- ասում է Հովհաննես Հովհաննիսյանը:
Օրենքի խնդրահարույց դրույթներից բացի «Ռադիոլուրի հյուրասրահում» քննարկվել են միջին մասնագիտական և նախադպրոցական կրթության խնդիրները: