Մարիա Պապյան
«Ռադիոլուր»
Թուրքիայի նախագահ Ռեջեփ Թայիփ Էրդողանը նախօրեին հայտարարել է առաջիկա օրերին Սիրիայի հյուսիսում ռազմական գործողությունների վերսկսման որոշում ընդունելու մասին։ Ըստ Էրդողանի՝ գործողությունների նպատակը Սիրիայի սահմանամերձ հատվածը քրդերի ինքնապաշտպանական ուժերից մաքրելը և այնտեղ Թուրքիայում հաստատված սիրիացի փախստականներ բնակեցնելը։
Մարտական և բեռնատար մեքենաներ, տանկեր և բազմաքանակ անձնակազմ. Թուրքիան երեկվանից արդեն զինտեխնիկան կուտակում է Սիրիայի հետ սահմանին, չնայած Թուրքիայի արտգործնախարար Մևլութ Չավուշօղլուի հայտարարությանը, թե «Թուրքիան հարգում է Սիրիայի տարածքային ամբողջականությունը և Թուրքիայի ռազմական գործողությունները Սիրիայի տարածքում ժամանակավոր բնույթ են կրում»: Այդուհանդերձ, Սիրիա ներխուժման հավանականությունը մեծ է։
Իր հերթին պաշտոնական Դամասկոսը թուրքական կողմի հայտարարությունը Սիրիայի ինքնավարության ու տարածքային ամբողջականության խախտում է որակել:
Ի՞նչ համատեքստում պետք է դիտարկել Թուրքիայի ռազմատենչ հռետորաբանությունն ու Սիրիա ներխուժումը, և ինչո՞վ է պայմանավորված պաշտոնական Անկարայի միաժամանակյա, այսպես ասած, խաղաղասիրական հայտարարությունը երկրի տարածքային ամբողջականության վերաբերյալ։ Հարցերի շուրջ զրուցում ենք քաղաքագետ Վազգեն Պետրոսյանի հետ։
