ԿարևորՀասարակություն

Ձորի Միրոյի ծոռն է բացառիկ հարցազրոյցի հիւրս

ԱնԻ Զէյթունցեան
«Ռատիօ լուր»

Գերմանիոյ Համպուրկ քաղաքէն ժամանած դիմածնօտային վիրաբոյժ փրօֆեսօր Ճորճ Խուրին է մեր  հարցազրոյցի հիւրը։ Մխիթար Հերացի անուան բժշկական համալսարանէն շրջանաւարտ եղած ուսանողը՝   29 տարի առաջ կը մեկնի Գերմանիա ու կը մասնագիտանայ գեղագիտական վիրաբուժութեան դիմածնօտային բաժինը, որպէս փրոֆեսօր կոչումով։ Այսօր յայտնի մասնագէտը Գերմանիոյ մէջ ունի իր սեփական կեդրոնը պլաստիկ  վիրահատութիւններու։

Այս անգամ  նոյն պատճառով եկած էր Հայաստան, կատարելու գործողութիւններ և մասնակցելու բժշկական համաժողովին,  իր հետ բերելով արդիական նորութիւնները բժշկական   ասպարէզին մէջ, ան կամուրջ կը հանդիսանայ Գերմանիոյ, Հայաստանի և Սուրիոյ միջև։

Մեր հիւրը կը խոստովանի, որ իր կապուածութիւնը  Հայաստանին տարբեր զգացում է,  հակառակ ծնած ըլլալուն Սուրիոյ Լաթաքիա քաղաքը։ Ան 17 տարեկանին եկած է Հայաստան ուսման նպատակով, այստեղ անցուցած է իր աշխոյժ երիտասարդութիւնը։

«Սովետական օրերուն ուսուցումը խիստ էր» . ան կը յայտնէ իր երախտագիտութիւնը հայրենիքին։

Փրոֆեսօր Ճորճ Խուրին յաճախ կ՛այցելէ Հայաստան և կը կատարէ ուսուցողական վիրահատութիւններ , իսկ այժմ իր մէկ  հատիկ աղջիկը՝  Լուսին, նոյնպէս կ՛ուսանի  իր հօր աւարտած համալասարանը բժշկութիւն:

Ես հարցուցի բժիշկին, թէ ասչափ հայրենասիրութիւն որմէ առած է և իմացայ որ Ճորճի մայրը եղած է Ձորի Միրոյի թոռը , հետևաբար մեր հիւրը Ձորի Միրոյի ծոռն է: Ան նաև բացայայտեց պատմութեան պակաս օղակը հանդիսացող այն հատուածը, որ Ձորի Միրօն մինչև Հայաստան գալը Արևմտահայաստանի մէջ ունեցած էր ընտանիք և զաւակներ։

Մեր հիւրը իր միտքին մէջ դրած է, որ  օր մը անպայման բոլոր ջանքերը գործադրէ և ձեռնարկէ համանուն  ֆիլմի նոր տարբերակի մը պատրաստութեան։

Զարմանալ պէտք չէր, որովհետև բժիշկը կը կրէր սասունցիի արիւնը, գուցէ այդ պատճառով ալ այդքան հայկականութեամբ կը տրոփէր իր սիրտը։

«Այս անգամ Երևանը աւելի պայծառ տեսայ  և աշխոյժ․․աշխարհի մէջ չկայ տեղ մը որ ամէն մարդ հաւասար գոհ ըլլայ», -ըսաւ բժիշկը և յորդորեց միասնութեան և իրար կարելիին չափ նեցուկ կանգնելու․․ .

«Առաւօտուն երբ արթննամ սուրճս կ՛առնեմ և պատշգամբ ելլելով Արարատը կը դիտեմ ու լիաթոք կը շնչեմ հայրենիքս»,- արտայայտուեցաւ բժիշկը ու աչքերուն մէջ յուզմունքը երևաց։

Ցուցադրել ավելի
Back to top button
Close