Լուսինե Վասիլյան
«Ռադիոլուր»
Տնտեսագետների մեծամասնության համար ընդունելի և ունիվերսալ բանաձև կա՝ զարգացող երկրների տնտեսություններին անհրաժեշտ են ներդրումներ, տնտեսական աճը կախված է օտարերկրյա ուղղակի ներդրումներից:
Տնտեսագետ Վահե Հովհաննիսյանը կարծում է, որ Հայաստանի համար նույնքան կարևոր են տեղական ներդրումները: «Տեղացի ներդրողը ներդրում է անում իր ապագայի, իր երեխաների ապագայի մեջ, օտարերկրացին մեր երկիրը դիտարկում է որպես ռեսուրս », — ասել է տնտեսագետը «Արժեքների հեղափոխություն» հաղորդման ժամանակ:
Նա խոշոր ներդրումների բացակայությունը բացասական չի գնահատում,
որովհետև կարծում է, որ ամեն ինչ մարսվելու կարիք ունի:
«Եթե երկրի ինստիտուցիոնալ
կառուցվածքը և մարսողական համակարգն ունակ չեն մարսել խոշոր ներդրումը, ապա այն ավելի
շատ մարսողական խանգարում է առաջացնելու, քան օգուտ», -ասել է տնտեսագետը, նշել Լիադիանի օրինակը և հավելել՝ պետք է
ունենալ պետական համակարգ, որն ի վիճակի կլինի հակազդել խոշոր կապիտալին:
Քանի դեռ չունենք կայացած պետական ինստիտուտներ, ըստ Հովհաննիսյանի, գլխավոր հույսը պետք է դնենք տեղական ներդրումների վրա, զուգահեռ աշխատենք դրսից գիտելիք, ունակություն, նորարարություն բերելու ուղղությամբ:
