Հարգանքով եմ վերաբերվում մանդատը հանձնելու «Լուսավոր Հայաստան»-ի ակնկալիքին, բայց նաև պատասխանատու եմ իմ այն ընտրողների առաջ, որոնք ինձնից պահանջում էին մնալ և շարունակել պատգամավորական գործունեությունը՝ «Ռադիոլուրի հյուրասրահում» ասել է ԱԺ պատգամավոր Արման Բաբաջանյանը՝ անդրադառնալով «Լուսավոր Հայաստան» խմբակցությունը լքելու և անկախ պատգամավորի կարգավիճակով գործունեությունը շարունակելու իր որոշմանը:
ԱԺ կանոնակարգը պատգամավորին տալիս է խմբակցությունը լքելու հնարավորություն, բայց չի հստակեցնում նրա հետագա կարգավիճակը: «Ես չեմ կարող լինել խորհրդարանական որևէ հանձնաժողովի կազմում, բայց նաև նույն կանոնակարգի մեկ այլ հոդվածով պարտավոր եմ ընդգրկված լինել որևէ հանձնաժողովում: Սա իրավական կազուս է », -ասել է Բաբաջանյանը:
Պատգամավորի կարծիքով՝ խորհրդարանի թե ընդդիմադիր, թե իշխանական խմբակցությունները համարժեք չեն քաղաքական իրողություններին ու մարտահրավերներին: «Գործելու եմ որպես ընդդիմադիր պատգամավոր՝ երեք խմբակցություններին հիշեցնելով իրենց անելիքը», -ասել է Արման Բաբաջանյանը:
