ԿարևորՀասարակություն

22-ամյա Արմինե Գրիգորյանը՝ «Աշխարհի լավագույն զինծառայող»

Արմինե Գևորգյան
«Ռադիոլուր»

Հայաստանի թիմը «Խաղաղության մարտիկ»  մրցույթում զբաղեցրել է առաջին տեղը, իսկ լավագույն զինծառայող տիտղոսին արժանացել է 22-ամյա, ծնունդով տավուշցի Արմինե Գրիգորյանը: Սա մի մրցույթ  է, որտեղ ստուգվում են մարտական վարպետությունը, ֆիզիկական պատրաստվածության մակարդակը, գնահատվում են ռազմական պատմության վերաբերյալ մասնակիցների գիտելիքները  և ստեղծագործական ունակությունները։ Մրցանակներն ու պատվոգրերն այսօր հաղթողներին հանձնել են պաշտպանության նախարար Դավիթ Տոնոյանը և Ռուսաստանի պաշտպանության փոխնախարար Անդրեյ Կարտապալովը՝ Դիլիջանում՝ Մոնթե Մելքոնյանի անվան ռազմաուսումնական վարժարանում:

«Աշխարհի լավագույն զինծառայող»  տիտղոսակիրը մեր հայրենակից   Արմինե  Գրիգորյանն է:  22-ամյա  Արմինեն սովորել  է Վազգեն Սարգսյանի անվան ռազմական  ինստիտուտում  ու ծառայության  է անցել Զինված ուժերում՝  որպես դասակի հրամանատար:   Հաշվում  է այն մեդալների քանակը,  որոնց արժանացել է  «Խաղաղության  մարտիկ» միջազգային   մրցաշարում. 

«Մեդալների  ընդհանուր թիվը 7 է: Հինգը՝  մրցափուլերի համար է, չորսը՝  առաջին մրցանակ են,  մեկն  էլ՝ երկրորդ: Մրցանակների արժանացել եմ  «Դիպուկահար», «Ռազմական պատմության գիտելիքների ստուգում» և «Էրուդիտ»  մրցաձևերից»:

Ծնունդով տավուշեցի, Արծվաբերդ գյուղում ծնված  Արմինեի ընտանիքում  մայրն է  փոքր-ինչ դեմ եղել, որ աղջիկը զինվորական դառնա , բայց կարճ ժամանակ անց համակերպվել է այդ մտքին: «Ականջներումս  միշտ եղել է թշնամու կրակոցների  ձայնը, քանի որ ապրել եմ  սահմանամերձ  Արծվաբերդ գյուղում», -ասում է Արմինեն ու հավելում, որ  հենց դա էլ   նպաստել է, որ   ընտրի   զինվորականի մասնագիտությունը: 

«Դպրոցում մասնակցում   էի ռազմամարզական խաղերի օլիմպիադային, ու հենց դա էլ նպաստեց,  որ դառնամ զինվորական:  Ես միշտ ասել եմ,  որ  եթե մասնագիտությանդ լավ ես տիրապետում,  ավելի հեշտ  է, քան տղաներին: Սկզբում զարմանում էին, որ աղջիկը կարող  է լինել դասակի հրամանատար, այն էլ 22 տարեկան: Բայց դա միայն սկզբում է, հուսով եմ՝ կհամակերպվեն , քանի որ գնալով կին զինծառայողներն ավելանում են բանակում»:

Մեդալներից առանձնացնում եմ «Լավագույն դիպուկահար» մեդալը  ու  հարցնում՝ հնարավո՞ր  է  ինչ-որ ժամանակ հետո դիպուկահարի դիրքում լինի: Արմինեն  ժպտում է ու ասում, որ դասակի հրամանատար լինելով՝ կարող է ավելին անել:

«Դիպուկահարը ավելի թեթև մասնագիտություն է, ես կարող եմ ունենալ իմ ենթակայության  տակ դիպուկահարներ: Այս պահին էլ սովորում եմ ԵՊՀ -ում և երազանք ունեմ ռազմական ոլորտում  Հայաստանը ներկայացնել  միջազգային հարթակներում, բայց առայժմ դեռ այդ մասին չեմ մտածում»:

«Խաղաղության մարտիկ» մրցույթը տևել է 14 օր և ներառել է  ռազմամասնագիտական «Պրոֆեսիոնալ» (կողմնորոշում տեղանքում, մարտական պատրաստության համալիր վարժություններ, բուժօգնության կազմակերպում), ռազմամարզական «Ատլետ», կրակային պատրաստության «Դիպուկահար»,  ռազմական պատմության գիտելիքների ստուգման «Էրուդիտ» մրցաձևերը: Պայքարը բավական թեժ է եղել,  քանի որ բոլոր  երկրները ներկայացրել էին իրենց լավագույն մարզիկներին:  Ռուսատանի զինված ուժերի ներկայացուցիչ սերժանատ   Գեգվարձի  Դադուկավիլոն նշում է, որ մրցաշարը  շատ կարևոր  էր  իրենց  երկրի համար: 

«Հայերը շատ ուժեղ են, բայց մենք էլ հետ չենք մնում: Ասում են՝ եթե տանն ես,  անգամ պատերն են քեզ օգնում:  Բայց մենք կձգտենք,  կմարզվենք, որ ավելի լավ ներկայանանք: Սա պատվաբեր մրցակցությունն էր, քանի որ բոլոր  թիմերն էլ ուժեղ էին»:

Հայաստանն առաջին անգամ է առաջին տեղը զբաղեցնում մրցաշարում:  «Սա  կարևոր ձեռքբերում է մեր բանակային կյանքում»,- ասում  է պաշտպանության նախարար Դավիթ Տոնոյանը:

Բարեկամական բանակների զինծառայողների ռազմապրոֆեսիոնալ վարպետության «Խաղաղության մարտիկ» միջազգային մրցույթն անցկացվում է 2009թ–ից , ամեն տարի ։ Մրցումներին մասնակցում են  Հայաստանի  դաշնակից և բարեկամ պետությունները՝ ՌԴ-ն, Ղազախստանը, Բելառուսը, Հունաստանը և Իրանը:

Ցուցադրել ավելի
Back to top button
Close