«Ռադիոլուն» օրերս ահազանգ էր ստացել Ավան վարչական շրջանից. բնակիչներն ահազանգում էին հարևաններից մեկի առողջական ու սոցիալական խնդիրների մասին, նշում, որ պարբերաբար դիմում են պատկան մարմիններին, սակայն հարցը վերջնական լուծում չի ստանում:
«Ռադիոլուրը» որոշեց գնալ ահազանգի հետքերով, բայց մինչ տեղ կհասներ, պարզվեց՝ արդեն ուշ էր:
Ո՞ր կառույցը պետք է զբաղվի նման իրավիճակում հայտնված մարդկանց խնդիրներով, ի՞նչ ծրագրեր կան նրանց խնամակալությունը կազմակերպելու համար:
Ավան վարչական շրջանի 2/1 շենքի բնակիչները տարիներ շարունակ իրենց հարևան Գարիկ Պետրոսյանի անսովոր վարքի մասին տեղեկացրել են պատկան մարմիններին: Հարևանների բնորոշմամբ՝ հոգեկան շեղումներ ունեցող երիտասարդ ու միայնակ տղամարդը վերջին 5 տարիներն անցկացրել է հոգեբուժարանում, սակայն այնտեղից դուրս գալուց հետո բնակվել վերոնշյալ հասցեում գտնվող իր բնակարանում` չունենալով պայմաններ:
Համատիրության ղեկավար Մարիետա Քարամյանը մի քանի անգամ փորձել է կապ հաստատել Կանադայում բնակվող եղբոր հետ, նա, սակայն, որևէ պատասխանատվություն չի ստանձնել : Հարևանները փորձել են իրենց միջոցներով նրան տեղափոխել հիվանդանոց, սակայն անձնագիր չունանելու պատճառով չեն կարողացել քայլեր ձեռնարկել, Թաղապետարանի ու հարևանների միջոցներով երկու անգամ տեղափոխվել է հոգեբուժարան, սակայն 24 օր անց նորից վերադարձել է տուն, «Ռադիոլուրին» իրավիճակը ներկայացնում էր հարևաններից մեկը:
«Բնակչությոունը բազմիցս է իր հետ խնդիրներ ունեցել: Իրանից բոլորը վախենում էին»:
Անսովոր վարքից բնակիչները շատ են տուժել ու ամեն անգամ դիմել այս կամ այն կառույցին, սակայն արձագանք չստանալով իրենք են քայլեր ձեռնարկել: Վերջին անգամ, զանգահարել են շտապօգնություն, սակայն ծառայությունն ուշ է արձագանքել ահազանգին:
«Իրենք եկան, սակայն բնակչության գոռգոռոցից հետո տարան»:
«Ռադիոլուրը» որոշեց գնալ ահազանգի հետքերով, լսել բնակիչների մտահոգություններն ու օգնել նաև երիտասարդին: Մինչ տեղ կհասնեինք, իմացանք, որ վերջինը հոգեբուժարանում հանկարծամահ է եղել: Տեղեկությունը հաստատեց նաև համատիրության ղեկավար Մարիետա Քարամյանը:
«Ուղղակի մենք խնդրում ենք սոցապ նախարարին, որ նման մարդկանց հաշվառեն»:
Ո՞ր կառույցը պետք է զբաղվի նման իրավիճակում հայտնված մարդկանց խնդիրներով, ի՞նչ ծրագրեր կան նրանց խնամակալությունը կազմակերպելու համար: Աշխատանքի և սոցիալական հարցերի նախարարության տարեցների և հաշմանդամների հիմնահարցերի վարչության պետի տեղակալ Անահիտ Գևորգյանը «Ռադիոլուրի» հետ զրույցում նշեց, որ հոգեկան առողջության խնդիրներ ունեցող անձանց նախարարությունը պետք է տեղավորի խնամքի հաստատություններում:
Հայաստանում կա երկու պետական հաստատություն՝ Վարդենիսի նյարդահոգեբանական տուն-ինտերնատը և «Ձորակ» հոգեկան առողջության խնդիրներ ունեցողների խնամքի տունը, որտեղ սպասարկվում, խնամք է ստանում և բնակվում է մոտ 570 մարդ: Սրանցից բացի՝ կան նաև ոչ պետական երկու փոքր խնամքի տներ՝ Սպիտակի խնամքի և «Ջերմիկ անկյան» խմբային ու համայնքային տները: Սակայն պետական կառույցում էլ են հասկանում, որ եղածը շատ քիչ է, քանի որ հանրապետությունում գրանցված է մոտ 50 հազար հոգեկան խնդիր ունեցող անձ, որոնց մեծ մասն ունի խնամքի կարիք:
Նախարարության ներկայացուցիչը խոստովանում է, որ հոգեկան առողջության խնդիրներով անձանց համար չկան բավարար շուրջօրյա խնամքի և այլընտրանքային ծառայություններ: Կան մշակված ծառայությունների ծրագրեր: Խնդիրը ֆինանսական է: Փորձում են գտնել դոնորներ: Դիմել են կառավարությանն ու միջազգային դոնոր կազմակերպություններին:
«Կարողանանք մենք ստեղծել համայնքային գոնե մի քանի տներ»:
Շենքային պայմաններ կան, սակայն կա դրանք վերանորոգելու ու խնամքի պայմաններ ապահովելու խնդիր, եզրափակեց Անահիտ Գևորգյանը:
