Լուսինե Ավանեսյան
Ռադիոլուր-Ստեփանակերտ
Արցախի Տիգրանակերտի թանգարանից այս տարվա սեպտեմբերի 27-ին անհետացել էր 2010 թվականի պեղումների ընթացքում հայտնաբերված Միհրդատ Երրորդի արծաթյա դրամը:
Դեպքի առթիվ քրեական գործ է հարուցվել Արցախի ոստիկանության կողմից, սակայն առայժմ որեւէ առաջընթաց չկա: Դրամն այդպես էլ չի հայտնաբերվել:
Մասնագետներն ասում են, որ պարթեւական Միհրդատ Երրորդի արծաթյա դրամը սեւ շուկայում այնքան էլ մեծ արժեք չունի, եւ դժվար թե նրա գինը գայթակղեր գողին: Դրա արժեքն այն է, որ հայտնաբերվել է հենց Տիգրանակերտում եւ այն թանկ է հենց Տիգրանակերտի համար:
Ինչն է եղել անհայտ անձի շարժառիթը՝ դժվար է ասել, բայց ոստիկանները ոչ նրան, ոչ էլ դրամն առայժմ չեն հայտանբերել:
Արցախի մշակույթի, երիտասարդության հարցերի եւ զբոսաշրջության նախարար Լեռնիկ Հովհաննիսյանն այսօր լրագրողների հետ հանդիպմանն ասել է, որ դրամի գողությունը եզակի դեպք է Արցախի թանգարանների համար:
Վերջին 10 տարիներին թանգարանային գողության որեւէ դեպք չի գրանցվել: Արցախի պատմաերկրագիտական թանգարանի տնօրեն Մելանյա Բալայանը «Ռադիոլուրին» ասաց, որ իրենց թանգարանում նմուշների անհետացման վերջին դեպքերը եղել են պատերազմի օրերին, այսօր ցուցանմուշները, չնայած տեխնիկական հնարավորությունների սղությանը, պատշաճ ձեւով պահպանվում են:
Տիգրանակերտի թանգարանում մինչեւ գողության դեպքը պահպանությունն անհնար էր մի շարք պատճառներով։ Նախ՝ թանգարանը բնակավայրերից հեռու է, երկրորդ՝ աշխատողների պակաս կա:
Դեպքից հետո անվտանգության համակարգն ուժեղացվել է, թանգարանի ներսում տեղադրվել են տեսավերահսկման սարքեր։ Այդպիսիք կան Արցախի հայտնի թանգարաններում եւ պատկերասրահներում՝ վստահեցնում է նախարարը: Ցուցանմուշների անվտանգությունն է, որ հնարավորություն է տալիս ցուցադրել օտարերկրյա հայտնի արվեստագետների աշխատանքները:
Նախարարը վստահեցնում է, որ այսուհետ թանգարանային ցուցանմուշների վկայագրման գործին զուգընթաց մշտադիտարկում է իրականացվելու` նաեւ հավաքածուների ապահովվածությունը ստուգելու նպատակով:
