ԲՀԿ և ՀՅԴ կառավարությունը լքելուց հետո վերջին նշանակումները արված են
Կառավարության արտահերթ նիստ՝ վարչապետի հրաժարականի ակնկալիքով, սակայն՝ առանց հրաժարականի:
Փաշինյանը խոստացել է՝ երեկոյան հանդես կգա կարևոր հայտարարությամբ: Գործադիրն այսօր արտահերթ նիստ է անցկացրել՝ օրակարգում՝ հինգ հարց էր ներառված:
Հինգից երեքը մարզպետների նշանակման նախագծերն էին: Նիկոլ Փաշինյանը հայտարարել է՝ այս նշանակումներով ուրվագծվում է ապագայի վերաբերյալ իշխանության պատկերացումները:
Հրաժարական կտա՞, թե՞ ոչ. երեկվանից մամուլում քննարկվում էր կառավարության այսօրվա արտահերթ նիստի, այսպես ասենք, դրդապատճառները: Կառավարության նիստի սկզբում վարչապետ Նիկոլ Փաշինյանը ցրեց բոլոր կասկածները:
«Երեկոյան հանդես կգամ հայտարարությամբ»:
Նիկոլ Փաշինյանը երեկոյան հանդես կգա հայտարարությամբ
Թե խորհրդարանական ընտրություններից հետո կառավարությունն ինչ պատկեր կունենա, դժվար է ասել։ Այս պահին հստակ է՝ ազգային համաձայնության կառավարությունից ոչինչ չի մնացել:
ԲՀԿ և ՀՅԴ կառավարությունը լքելուց հետո վերջին նշանակումները արված են՝ տնտեսական զարգացման ու ներդրումների նախարարի պաշտոնը վստահվեց նախկին փոխնախարար Տիգրան Խաչատրյանին, գյուղատնտեսության նախարարի պաշտոնը՝ գյուղատնտեսության զարգացման հիմնադրամի տնօրեն Գեղամ Գևորգյանին:
Արմավիրը, Արագածոտն ու Սյունիքը նոր ղեկավարներ ունեցան: Նշանակումները Նիկոլ Փաշինյանը սիմվոլիկ անվանեց:
Այս նշանակումներում ամենաշատը թերևս քննադատվեց Հունան Պողոսյանի նշանակումը՝ Սյունիքի մարզպետի պաշտոնում: Նա երկար տարիներ զբաղեցնում էր ոստիկանության պետի առաջին տեղակալի պաշտոնը: Կադրային քաղաքականությունից մեկ անգամ ևս Նիկոլ Փաշինյանը խոսեց:
Ինքը՝ Պողոսյանը, սպասում էր առաջարկի, բայց թե ինչպիսի՝ չգիտեր:
Արագածոտնի մարզպետ նշանակված տարածքային կառավարման ու զարգացման նախարարի տեղակալ Դավիթ Գևորգյանը, Փաշինյանի բնութագրմամբ, թավշյա հեղափոխության ակտիվ մասնակիցներից է: Կառավարության նիստից հետո նա հայտարարեց ՝ որոշել է ՔՊ անդամ դառնալ: Վստահեցրեց՝ մարզում կուսակցականություն չի լինի:
Արմավիրի մարզպետը՝ Համբարձում Մաթևոսյանն է. նրան ներկայացնելիս՝ կառավարության ղեկավարն ասաց՝ ընդհանրապես քաղաքական նախընտրություն չունեցող, կամ քաղաքական չեզոք միջավայրից եկող գործիչ է: Նիկոլ Փաշինյանն ընդգծեց՝ ըստ էության այս նշանակումը ուրվագծում է նաև ապագայի վերաբերյալ իրենց պատկերացումները: