Քարոզարշավի 12 օրերի ընթացքում ընտրարշավի մասնակից ուժերի միջև բանավեճ՝ ժանրի դասական կանոններով, չկայացավ: Թեկնածուներն ու նրանց թիմերը թեև հեռակա սուր բանավեճի մեջ մտան, բայց չկարողացան միասին, մեկ տեղում ու նույն օրակարգով քննարկում ծավալել:
Միակ փորձը Հանրային հեռուսատընկերությանն էր, որը, սակայն լիարժեք չէր, քանի որ դեբատներին մասնակցել են ոչ բոլոր ուժերը:
Ի՞նչը խանգարեց ընտրությունների մասնակից ուժերին նախընտրական լիարժեք բանավեճերի մասնակից դառնալ, ինչո՞ւ այս անգամ էլ նախընտրական դեբատները չկայացան:
Այսօր երեկոյան Հանրային հեռուստաընկերության եթերում բանավիճելու են Երևանի ավագանու արտահերթ ընտրություններին մասնակցող քաղաքական ուժերի քաղաքապետերի թեկնածուները: Հրավեր ստացել են բոլորը, դեբատին, սակայն, որն արդեն տեսանկարահանվել է, մասնակցել են 12 ուժերից 8-ը՝ «Ռադիոլուրին» փոխանցեց «Խաղի կանոններ» հաղորդման հեղինակ և վարող Արմեն Դուլյանը:
Նրա փոխանցմամբ՝ «Երկիր ծիրանի»-ն ու «Ռեֆորմիստները» չեն մասնակցել առանց բացատրության, ԺՈՒԿ-ը՝ հարգելի պատճառով, իսկ ԲՀԿ ցուցակի առաջին համարը ՝ հրապարակայնորեն հնչեցրած իր հայտնի նախապայմանով: Նաիրա Զոհրաբյանը քարոզարշավի ընթացքում մի քանի անգամ ասել էր, որ 12 թեկնածուների բանավեճն անարդյունավետ ձևաչափ է համարում, չի կարծում, որ երևանցուն այդ քննարկումն իսկապես կողմոնորշելու է: Զոհրաբյանը դեբատների իր նախապայմանն էր առաջարկել՝ բանավիճելու թեմաներ ունի թեկնածուներից միայն մեկի հետ:
«Ինչո՞ւ միայն Հայկ Մարությանի հետ, որովհետև ուրիշ ոչ մի ուժ սևերի ու սպիտակների մասին չի խոսել, որևէ այլ ուժ չի ասել՝ մեր դեմ խաղ չկա: Ուստի բանավիճելու օրակարգ ես ունեմ բացառապես և միմիայն «Իմ քայլը» դաշինքի քաղաքապետի թեկնածուի հետ»:
Ի պատասխան Հայկ Մարությանն ասել էր, թե չի ցանկանում որևէ մեկին առանձնացնել և պատրաստ է բանավիճել, բայց՝ բոլոր թեկնածուների հետ:
«Ես ունեմ 11 օպոնենտ, ոչ մեկին չեմ ուզում առանձնացնել, որևէ մեկին չեմ ուզում առավելություն տալ»:
Ի դեպ, ԲՀԿ ցուցակի առաջնորդը մի նախապայմանի մասին էլ էր խոսել. Չգրված կանոն է՝ դեբատները պետք է ընթանան ուղիղ եթերում: Նաիրա Զոհրաբյանը տեսանկարահանված բանավեճը աբսուրդ էր որակել:
«Ես չեմ պատկերացնում տեսանկարահանված դբատ, սա վիրավորանք է ընտրության մասնակից յուրաքանչյուր թեկնածուի նկատմամբ»:
Վերլուծաբան Արմեն Բաղդասարյանը համաձայն է Նաիրա Զոհրաբյանի այն դիտարկմանը, որ նախընտրական դեբատների հիմնական առավելությունը դրանց ուղիղ հեռարձակմամբ ընթացքն է: Այս առումով, կարծում է, որ կազմակերպված միակ բանավեճը այդ իսնտիտուտից իրական ակնկալիքնը չի արդարացնում:
«Սա այն դեպքն է, որ ավելի լավ էր փորձ չլիներ, քանի կիսափորձ լիներ, որովհերտև եթե ոչ բոլոր թեկնածուներն են մասնակցում արդեն անհավասար պայմաններ են, երկրորդն էլ ՝ Նաիրա Զոհրաբյանն այս կետում ճիշտ է. դեբատների ամբողջ հմայնքը դրանց ուղիղ եթերում ընթանալն է»:
Արմեն Բաղդարասյանն արձանագրում է. այնքան էլ լավ չէ, որ իրական բանավեճը՝ ժանրի կանոններով այս անգամ էլ չկայացավ: Պատճառները, կարծում է, ընտրությունների քաղաքական ենթատեքստում են:
«Այս ընտրություններում, թեև սրանք Երևանի քաղաքապետի ընտրություններ են, բայց կոնկետ Երևանի ապագա քաղաքապետի անձը երկրորդ պլանում էր: Բուն խնդիրը շատ ավելի լուրջ էր, շատ ավելի քաղաքական՝ միտված ապագա խորհրդարանական ընտրություններին և ընդհանարապես Հայաստանի ներքաղաքական վիճակի հեռանկարին»:
Ակնկալիքը, որ կար այս ընտրությունների նախաշեմին, թե տեսնելու ենք իրական ու դասական դեբատներ, թերևս հետաձգվում է մինչև հաջորդ ընտրություններ: