Ակտիվ հանգստի շրջանում Վրաստան եւ, մասնավորապես, աջարական լողափեր մեկնող հայ քաղաքացիները վերջին շրջանում փոխանցում են իրենց որոշ մտահոգությունները. այդ երկրի տարածքում ենթարկվում են տուգանքների` ճանապարհային երթեւեկության կանոնները խախտելու համար:
Սակայն վարորդներից շատերը համաձայն չեն տուգանքի ակտերի հետ, իսկ վիճարկելու առումով խնդիրներ են ունենում, քանի որ կոնկրետ ժամկետում պարտավոր են դիմում ներկայացնել կրկին այդ երկրում:
Զրուցակիցս հաճախ է լինում Վրաստանում. զբոսաշրջային երթուղային փոխադրում է իրականացնում: Հարեւան երկրում երթեւեկության կանոններին տեղյակ է, մինչ այժմ տուգանքների չի ենթարկվել, բացի վերջին օրերին իր հանդեպ կիրառված ակտից` 200 լարիի չափով: Մխիթարը վերապահումով է մոտենում տուգանքի կիրառմանը:
Հայ վարորդը տուգանքի մասին իրեն տեղեկացնող ոստիկաններից փորձել է պարզաբանում ստանալ, սակայն բավարար պատասխան չի եղել: Ոստիկաններին էլ չի բավարարել վարորդի պարզաբանումն այն մասին, որ կրկնակի հոծ գիծը խախտել է ոչ իր մեղավորությամբ, այլ իր ճանապարհը փակած երկու այլ վրացական սմեքենայի: Ոստիկաններն էլ հրաժարվել են տրամադրել իրենց նկարահանումը` փաստելու ակտավորման հիմքը:
Հայաստան վերադառնալուց հետո Մխիթարը փորձել է ձեռնարկել հետագա քայլեր ու պարզել, որ տուգանքի ակտը բողոքարկել Հայաստանից չի կարող: ՀՀ ոստիկանության պարզաբանմամբ` իրենք այս գործընթացում անելիք չունեն. ամեն երկիր այս առումով իր օրենքն ունի: Ինչ է այս դեպքում նախատեսում վրացական օրենսդրությունը` ի պատասխան հայ վարորդների հարցի` «Ռադիոլուրը» հետաքրքրվեց Վրաստանում Հայաստանի դեսպանությունից:
Դեսպանության մամուլի, տեղեկատվության և հասարակայնության հետ կապի բաժնի ղեկավար Հարություն Հայրապետյանը փոխանցեց` քիչ չեն դեպքերը, երբ ՀՀ քաղաքացիությամբ վարորդները դիմում են իրենց` խնդրանքով` վրացերենով դիմումներ գրել, ուղղորդել, տեղեկացնել, թե ինչ անեն:
Վրաստանում երթեւեկության կանոնների խստացում վերջին տարիներին եղել է, ուստի այս նախադեպը թերեւս հիմք է հայ վարորդների համար` առավել զգոն լինելու: Միաժամանակ Վրաստանում Հայաստանի դեսպանության մամուլի, տեղեկատվության և հասարակայնության հետ կապի բաժնի ղեկավար Հարություն Հայրապետյանն ընդգծում է` եթե հայ վարորդները բախվում են երթեւեկության կանոնները խախտելու համար կազմված տուգանքի խնդրի եւ ակտը անհիմն համարում ու գտնում, որ ճանապարհային ոստիկանը կարող էր ներել, թող դիմեն վրացական ոստիկանական բաժանմունքներ:
Տեխնիկական հարցերում վարորդներին ընդառաջել պատրաստ է նաեւ Վրաստանում Հայաստանի դեսպանությունը:
