ՀՀ մանր եւ միջին գործարարները վերջին շրջանում բախվել են լուրջ խնդիրների, ինչի պատճառով ոմանք արդեն երկընտրանքի առջեւ են՝ շարունակե՞լ զբաղվել բիզնեսով։ Խնդիրը կապված է մաքսազերծման համար նախատեսված գների թանկացման հետ: Ռադիոլուրն այսօր փորձել է հասկանալ, թե ինչ է կատարվում այդ դաշտում:
<<Ռադիոլուր>>-ին դիմած ՀՀ քաղաքացին, ով 2007 թվականից զբաղվում է մանր առեւտրով այս տարի առաջին անգամ կանգնեց լուրջ խնդրի առաջ: Խնդիրը կապված է ապրանքների մաքսազերծման հետ: Բազմաթիվ մանր եւ միջին գործարարներ արդեն բախվել են դժվարությունների եւ դիմել են ԱԺ: <<Ծառուկյան>> խմբակցությունից պատգամավոր Սերգեյ Բագրատյանն անգամ կառավարությունից հրատապ քննարկում է պահանջում՝ հարցը քննարկելու եւ լուծումներ գտնելու համար:
Գործարարներն ասում են, որ մաքսազերծման հստակ գին երբեւէ չի գործել՝ անբացատրելի տատանումները եղել են միշտ: Դրանից կախված են եղել գների տատանումները ներսի շուկայում կամ գործարարի վնասները, եթե ինքը մաքսազերծել է թանկ գնով, իսկ մյուս գործարարի դեպքում նույն ապրանքի մաքսազերծման գինը հանկարծ նվազել է:
Մեր զրուցակցի անունը հասկանալի պատճառներով չենք հրապարակում: Մտավախություն ունի՝ խուսափում է հետագա բարդություններից, քանի որ աշխատում է ավելացված արժեքի հարկման դաշտում: Բայց ասում է՝ այսպես շարունակվել չի կարող: Ապրանքների մաքսազերծման գնի թանկացումը բերելու է հստակ խնդիրներ:
Գործարարներին անհրաժեշտ է հասկանալ նաեւ պետության մյուս տրամաբանությունը, թե ինչու տարբեր ապրանքների մաքսազերծման համար համատարած կիրառվում է միեւնույն գինը՝ 1 կիլոգրամի դիմաց 5 դոլար 2 ցենտ:
Խնդիրն առաջացել է գործարարներին օրենքի դաշտ վերադարձնելու հետ՝ պարզաբանում են պետական մարմինները: Պետեկամուտների կոմիտեից այսօր մեկնաբանություն ստանալ չհաջողվեց: Չի բացառվում, որ վաղը կառավարության նիստից հետո Դավիթ Անանյանը անձամբ կանդրադառնա այս խնդրին: Իսկ մինչ այդ՝ տարբեր պետական կառույցներից մեր ունեցած տեղեկությունն այն է, որ սեպտեմբերին արդեն պատրաստ կլինի փոփոխված <<Հարկային օրենգիրքը>> նախագիծը, որը ներկայացվելու է ԱԺ:
Այդ փաստաթղթով լուծման ենթակա խնդիրներից է նաեւ տարբեր ապրանքների մաքսազերծման դեպքում սակագների տարբերակված մոտեցումը: Պետական կառույցներից մեզ պատասխանում են, որ իրենք էլ շահագրգռված չեն, որ մաքսազերծումը տեղի ունենա թանկ գներով, պարզապես դեռ գործում է հին օրենքը: Այս դեպքում գերթադասելի է, որ գործարարները շարունակեն աշխատել, օգուտ ստանան եւ իրենց եկամուտներից հարկ վճարեն պետությանը:
