Ընդերքի տեսչական մարմինն առաջարկել է ուժը կորցրած ճանաչել բնապահպանության նախարարության փորձաքննաական եզրակացությունը:
Այն Ամուլսարի հանքավայրի շահագործման թույլտվությունն է ըստ էության:
Հանքավայրի շահագործմանը դեմ քաղաքացիները սա հաղթանակ, իսկ Լիդիան Արմենիայում՝ ականջահաճո որոշում են համարում:
ՀՀ բնապահպանության և ընդերքի տեսչական մարմինը նոր ի հայտ եկած էկոլոգիական գործոնների հիման վրա առաջարկում է ուժը կորցրած ճանաչել ՀՀ բնապահպանության նախարարի կողմից 29.04.2016թ. հաստատված թիվ ԲՓ-35 պետական փորձաքննական եզրակացությունը: Այսօր տարածած հաղորդագրությունում առաջարկվում է հետևյալը
«Լիդիան Արմենիա» ՓԲԸ-ին հանձնարարել ձեռնպահ մնալ Ամուլսարի հանքավայրում ընդերքօգտագործման հետ կապված որևէ գործողություն կատարելուց մինչև ՀՀ բնապահպանության և ընդերքի տեսչական մարմնի առաջարկության հիման վրա լիազոր մարմնի կողմից նոր փորձաքննության իրականացումն ու դրա արդյունքներով փորձաքննական եզրակացության ընդունումը»:
«Ռադիոլուրի» հետ զրույցում արդեն երկու ամիս Ամուլսարի հանքավայրի շահագործման դեմ պայքարողներից Վազգեն Գալստյանը սա հաղթանակ է համարում:
«Լիդան Արմենիա» ընկերության իրավաբան Արմեն Մելքումյանը «Ռադիոլուրին» փոխանցեց, որ բնապահպանության և ընդերքի տեսչական մարմինը ստուգման արդյունքների վերաբերյալ որոշում ուներ, որտեղ տրված են հասարակությանը հուզող բոլոր հարցերի պատասխանները՝ արձանագրվել են փոքր խախտումներ՝ վարչական պատասխանատվությամբ: Այսօր հրապարակած հաղորդագրությունը զրուցակիցս ականջահաճո է բնորոշում:
Մելքումյանը վստահեցնում է՝ իրենց աշխատակիցները ճանապարհ չեն փակել: Պարզապես խցանումներ են եղել, քանի որ ճանապարհները փակ են:
Այսօր առավոտյան «Լիդիան Արմենիա» ընկերության աշխատակիցների ու դեպի հանքավայր տանող ճանապարհները փակած քաղաքացիների միջև բախումներ են տեղի ունեցել:
Օգոստոսի 13-ին, երբ Լիդիան Արմենիա ընկերության աշխատակիցները բողոքի ակցիա էին կազմակերպել կառավարության շենքի մոտ, փոխվարչապետ Տիգրան Ավինյանի գրասենյակի ղեկավար Սերժ Վարագ Սիսեռեանը խոստացավ 12 աշխատանքային օրվա ընթացքում հայտարարել վերջնական եզրակացության մասին:
