Օգոստոսի 1-ին ատոմակայանը կվերագործարկվի. Նիկոլ Փաշինյան
Կատարե՞լ մեկ անձից գնում, թե՞ ոչ. կառավարությունն այսօր որոշել է մեկ անգամ ևս մանրամասն ուսումնասիրելուց հետո ընդունել համապատասխան որոշումը:
էներգետիկ ենթակառուցվածքների ու բնական պաշարների նախարար Արթուր Գրիգորյանը հայտարարել է՝ ստիպված են մեկ անձից կատարել գնումները, որպեսզի ՀԱԷԿ-ի երկրորդ էներգաբլոկի շահագործման ժամկետները չխախտեն:
Յուրաքանչյուր օրվա ուշացումը էներգետիկ համակարգին լուրջ վնասներ է բերում:
ՀԱԷԿ-ի երկրորդ էներգաբլոկի շահագործման ու ատոմակայանը վերագործարկելու համար վերցված վարկային միջոցների հետագա ճակատագիրը՝ «Ռադիոլուրի» ռեպորտաժում:
Հունիսի մեկից օգոստոսի մեկը ՀԱԷԿ-ի երկրորդ էներգաբլոկը կանգնած է պլանային նախապատրաստական վերանորոգման: էներգետիկ ենթակառուցվածքների ու բնական պաշարների նախարար Արթուր Գրիգորյանը վստահեցնում է՝
«ՀԱԷԿ-ի վերագործարկման ժամկետի յուրաքանչյուր օր ուշացումը էներգահամակարգին լուրջ դրամական վնասներ է բերում»:
Սա որպես նախաբան նախարարի՝ այսօր ներկայացրած նախագծի: ՀԱԷԿ-ի 2-րդ էներգաբլոկի վերանորոգման ժամանակ պարզվել է, որ չնախատեսված իրավիճակներ կան և անհրաժեշտ են նոր ապրանքներ ձեռք բերել: Եթե գնումները մեկ անձից չկատարվեն, ու շատ արագ, ապա սա ֆինանսական ու այլ խնդիրներ կստեղծի:
Հենց մեկ անձից կատարվող գնումների համակարգն էր, որն ամենաշատն էր քննադատում ընդդիմությունը իշխանափոխությունից առաջ, ուստի պատահական չէին վարչապետի հարցերը:
Ցանկում երեք մասնագիտական ապրանք ու ծառայություն է։ Նիկոլ Փաշինյանը, այդուհանդերձ, կողմնակից է մանրամասնորեն ոսուսմնասիրելուց հետո որոշում կայացնել:
Օգոստոսի մեկից կգործարկվի՝ անկախ որոշման նախագծից, ուստի գործադիրում մեկ անգամ ևս այն կքննարկեն:
Նույն այս՝ ՀԱԷԿ-ի երկրորդ էներգաբլոկի ժամկետի երկարաձգման նպատակով 270 մլն դոլար վարկ է վերցվել ու դրա մարումը ներառվել սակագնի մեջ: Էլեկտրաէներգիայի սակագինը կփոխվի, բայց 2020 թ.ին:
Որքա՞ ն է հնարավոր երկարացնել ատոմակայանի գործարկմանը ժամկետը՝ հարցնում եմ «Հայատոմ» ՓԲԸ գլխավոր տնօրեն Վահրամ Պետրոսյանին։ Նա միջազգային փորձն է մատնաշում՝ Ռուսաստանում, Հունգարիայում ու Ուկրաինայում ատոմակայանների շահագործման ժամկետը երկարաձգվել է մինչև 30 տարի: Հայաստանում ժամկետը որոշելու համար երկար պետք է աշխատեն:
Ատոմակայանի շահագործման ժամկետը լրացել է 2016թ։ Ատոմակայանի գործունեությունը կդադարեցվեր, եթե վարկային նոր միջոցներ չներգրավվեին՝ ասում է ՀԱԷԿ տնօրենը: