Արձագանք «Ռադիոլուրի» ունկնդիրների բարձրացրած խնդիրներից հերթականին: Արարարտի մարզի Խարբերդ համայնքի ամառանոցային հատվածի բնակիչները դժգոհ են՝ ոռոգման ջուր չունեն, ասում են՝ համայնքը տափաստան է դառնում:
«Ռադիոլուրը» գնացել է խնդրի հետքերով. զրուցել է տարածքը սպասարկող Երևան ՋՕ-ի տնօրենի հետ և լսել «վաղը բնակիչները ջուր կունենան» խոստումը:
Ամռան այս տոթին մեր երկրում օրեցօր ավելի ու ավելի հրատապ է դառնում ոռոգման ջրի բացակայության հարցը: «Ռադիոլուրն» այսօր հերթական ահազանգը ստացավ: Հեղինակը Արմեն Խաչատրյանն է:
Ահազանգը Խարբերդի ամառանոցային թաղամասի բնակիչներից է՝ 16,17,20 հասցեներից: Նախկինում ոռոգման ջրի խնդիրը կարգավորվում էր՝ ըստ ժամանակացույցի, այժմ «Ռադիոլուրի» զրուցակցի խոսքով, ժամանակացույց չկա, ոռոգման ջուր՝ նույնպես:
Խաչատրյանի խոսքով՝ խողովակները հին են, ջուրը տեղ չի հասնում:
Խարբերդի ոռոգման ջրի պատասխանատուն Երևան ՋՕ ընկերությունն է: Զրուցեցինք ընկերության տնօրեն Մերուժան Ասատրյանի հետ: Հաստատեց՝ իսկապես ամառանոցային հատվածներում ոռոգման ջրի հետ կապված խնդիրներ կան, խցանումներ են եղել խողովակներում:
«Ռադիոլուրի» մյուս զրուցակիցը Հարություն Մանուկյանն է 20-րդ փողոցի երրորդ նրբացքի 17-րդ տանն է բնակվում: Վստահեցնում է՝ ընկերությունը ոռոգման ջուրն ըստ ժամանակացույցի չի մատակարարում: Նրա հետ զրուցելիս մեր խոսկացությանը միացավ հարևանուհին՝ Հասմիկ Մանուկյանը:
Ասատրյանը վստահեցրեց՝ իրենց սպասարկած տարածքում ոռոգման ջրի անբավարարության խնդիր չկա:
Ոռոգման ջրի խնդիրը հրատապ է բոլոր մարզերում, հատկապես Արարատյան դաշտավայրում: Սա, ըստ վերջին, հետազոտությունների պայմանավորված է Արարատում և Արմավիրում ձկնային տնտեսությունենրի հախուռն շահագործմամբ: Սա, սակայն, հարցի միայն մի կողմն է: Զրուցակցիս՝ Ազգային ջրային համագործակցություն հասարակական կազմակերպության նախագահ, բնապահպան Արևիկ Հովսեփյանի խոսքով, ոռոգման ջրի խնդիրը ավելի շատ վատ կառավարման արդյունք է:
«Շատ հաճախ ասում են ջրի խնդիրը ոչ թե պակասից է, այլ՝ լավ կառավարումից: Լավ կառավարման դեպքում էլ դու կարող ես կարիքները բավարարել: Ցավոք սրտի մեզ մոտ կառավարման խնդիրը դեռ մնում է բաց: Հայաստանում կառավարման ապակենտրոնացումը չի ստացվում»:
Փորձագետն ընդգծում է՝ ջրի քանակի մոնիտորինգ չկա, իսկ դա կարևոր է: Մինչև չիմանաս՝ որքան ջրային պաշար ունես, չես կարողանա դրանք կառավարել: Մակերևութային ջրերի պաշարները հաշվվում են, ստորգետնյա ջրերի նը՝ ոչ: Արդյունքում՝ ունենք այն, ինչ ունենք:
