Ներդրումների թվեր ու ակնկալիքներ՝ պետական կառույցից, կասկածներ՝ տնտեսագետներից
Ներդրումների ներգրավմամբ և արտահանման խթանմամբ զբաղվող «Բիզնես Արմենիա»-ն` հիմնադրամը, որը մի քանի ամիս առաջ կոչվում էր Հայաստանի զարգացման հիմնադրամ, այս տարի 35 միլիոն դոլարից ավելի ներդրում է ակնկալում Հայաստանում:
Սակայն այս ակնկալիքներին ու հիմնադրամի նախորդ տարվա ցուցանիշերին տնտեսագետ Բաբկեն Թունյանը վերապահումով է մոտենում. հարցեր ունի, որոնց պատասխան է փնտրում:
Անցյալ տարվա ընթացքում ներգրավված եւ այս տարի սպասվող ներդրումների մասին «Բիզնես Արմենիա» հիմնադրամի ղեկավար Արմեն Ավակյանի փոխանցած տվյալներին տնտեսագետ Բաբկեն Թունյանը վերապահումով է մոտենում: Վերջինս սոցցանցի իր էջում մեկնաբանություն էր հրապարակել՝ «Բիզնես Արմենիայի» աջակցությամբ ստացված ներդրումների առնչությամբ պարզաբանում ակնկալելով։ Թունյանին զարմացրել էր հատկապես Ավակյանի ձեւակերպումը, թե ներդրումների մասին տվյալները կոնֆիդենցիալ են` գաղտնի:
Պարզաբանումն էլ չուշացավ: Ֆեյսբուքյան ասուլիս հրավիրվեց: Ավակյանը թվարկեց ներդրող ընկերությունների անուններն ու ներդրման ոլորտները: Վերահաստատեց իր նշած ներդրումների չափը:
«2017 թվականին իրականացված ներդրումները ընդհանուր 15 մլն 525 հազար դոլար է: 2018-ին արդեն ունենք 15.2 մլն դոլարի ակնկալվող ներդրումներ, նաեւ 20.2 մլն դոլար ներդրման ուղղութամբ դեռ աշխատում ենք»:
Ոսկերչություն, թեթեւ արդյունաբերություն, սննդի վերամշակում, արծաթագործություն, թղթի վերամշակում, նաեւ` ռազմարդյունաբերություն` ներդրումների համար գրավիչ ոլորտները թվարկեց «Բիզնես Արմենիա» հիմնադրամի ղեկավարը: Միայն վերջին ոլորտում ներդրողի անունը չհնչեց հասկանալի պատճառով. սա իսկապես գաղտնի է: Մյուս ներդրող կազմակերպությունների հետ, մանրամասնեց Ավակյանը, հերթով խոսել է հեռախոսով, ստացել իրենց անունը հրապարակելու համաձայնություն: Բիզնես Արմենիայի վերափոխված Հայաստանի զարգացման հիմնադրամի ղեկավարը նաեւ իրենց աշխատանքների թափանցիկությունից խոսեց: Վստահեցրեց` ԱԱԾ-ից հյուրեր ընդունելուն դեմ չեն:
«Մեզ մոտ` որպես բյուջետային կառույցի, այս պահին ստուգումներ են: Նաեւ անցյալ տարի են ստուգել, նախանցյալ տարի: Մենք բաց ենք, թափանցիկ, պատրաստ ենք տրամադրել բոլոր փաստաթղթերը: Իսկ ինչ վերաբերում է ԱԱԾ-ին, եթե կուզանա գալ մեզ հյուր, ես իրենց սուրճ կհուրասիրեմ»:
Սպառի՞չ էին արդյոք Ավակիանի հիմնավորումները ներգրավված ներդրումների մասին` հետադարձ հարց ուղղեցինք Բաբկեն Թունյանին: Ոչ` ասաց տնտեսագետը, ավելին՝ հարցերը բազմապատկվեցին։
Հարցըը բյուջետային կառույցի մասին է, ուստի ցանկանում է հասկանալ` իրե՞նք են գտել այդ ընկերություններին, ռազմարդյունաբերությանն առնչվող ինչ ինֆորմացիա է, որ հասանելի է այս հիմնադրամին, արդյոք արդարացված են հիմնադրամին ուղղվող ծախսերը:
Լրագրող, տնտեսագետ զրուցակիցս ողջունում է, որ պատրաստ են բանակցել, պարզաբանել, միաժամանակ պատրաստվում է գնալ իր հարցերի պատասխանի հետեւից:
Ամեն դեպքում, շնորհակալ եմ, որ պրն Ավակյանը մեկ ժամ շարունակ ֆեյսբուքյան Live-ով հատ-հատ ընթերցեց իմ գրառման տակի մեկնաբանությունները և պատասխանեց դրանց։
Ու շատ ողջունելի է, որ պատրաստակամություն հայտնեց պատասխանել այլ հարցերի, եթե կլինեն։ Ուրեմն շտապեմ ուրախացնել՝ կան բազում հարցեր, որոնք վաղը կամփոփեմ, կհրապարակեմ ու անհամբերությամբ կսպասեմ պատասխաններին։