Քաղաքական

Ինչ են քննարկելու ԱԳ նախարարները Բրյուսելում

Վաղը մեկնարկող ՆԱՏՕ-ի գագաթնաժողովին մասնակցելու նպատակով Բրյուսել կմեկնի ՀՀ վարչապետ Նիկոլ Փաշինյանի գլխավորած կառավարական պատվիրակությունը:

Գագաթաժողովի շրջանակներում նախատեսված է ՀՀ ԱԳՆ Զոհրաբ Մնացականյանի ու Ադրբեջանի ԱԳՆ Էլմար Մամեդյարովի առաջին հանդիպումը:

Մինչ երկու երկրների ԱԳՆ-ները հայտարարություններ են արել, որոշ եզրահանգումներ են անում հայաստանցի ու արցախցի քաղաքագետները: Կարծիքները տարբեր են:

Վաղը Բրյուսելում նախատեսված է Հայաստանի ԱԳՆ Զոհրաբ Մնացականյանի ու Ադրբեջանի ԱԳՆ Էլմար Մամեդյարովի առաջին հանդիպումը: Մինչև  հանդիպումը  երկու երկրների արտգործնախարարները խոսել են իրենց ակնկալիքների մասին: Զոհրաբ Մնացականյանի համար հանդիպումը կարևոր է բանակցային գործընթացի  դինամիկան պահելու առումով:

Հայաստանի արտգործնախարարը լավատեսորեն է տրամադրված, նա երկու կարևոր հարց է առանցնացնում՝ Արցախի կարգավիճակ ու  անվտանգության ապահովում:

Մամեդյարովը հանդիպումից առաջ ընդգծել է, որ «ուշադրությամբ և զսպվածությամբ» է  հետևել Հայաստանի քաղաքական գործընթացներին,  ակնկալում է ողջամիտ մոտեցում ղարաբաղյան խնդրի կարգավորման գործընթացում:

ԼՂ ԱԺ արտաքին հարաբերությունների հանձնաժողովի նախկին նախագահ Վահրամ Աթանեսյանին երկու երկրների ԱԳՆ-ների հայտարարությունները լավատեսության հիմք են տվել.

«ԱՄՆ մոտեցումն ու երկու երկրների ԱԳՆների  հայտարարությունները թույլ են տալիս հուսալ, որ Բրյուսելում փորձելու են վերականգնել բանակցային գործընթացը: Այսինքն կտրվի մեկնարկը»:

Քաղաքագետ Թևան Պողոսյանը, սակայն, Մամեդյարովի հայտարարությունից եզրակացրել է, որ հանդիպումից որևէ լուրջ ակիկալիք դժվար է ունենալ:

Հայաստանը բնականաբար բանակցային լիարժեք ձևաչափի վերականգնման պահանջով է ներկայանալու, ինչը, ըստ ԼՂՀ նախագահի մամուլի խոսնակ Դավիթ Բաբայանի, հուշում է, որ հանդիպումը թեժ մթնոլորտում է ընթանալու:

Ամեն դեպքում առաջին հանդիպումը կլինի ծանոթացում-հանդիպում՝ ըստ Դավիթ Բաբայանի, ինչի հիմքում խաղաղության ու կայության պահպանումն է: Բրյուսելում նախատեսված ՆԱՏՕ-ի գագաթնաժողովը, Թևան Պողոսյանի խոսքով, լավ հնարավորություն է ստեղծում արցախյան հիմնահարցի ներկայացման ու Արցախին բանակցություններում ներգրավելու կարևորության մասին աշխարհին բացատրելու առումով:

Ցուցադրել ավելի
Back to top button