Արմավիրի մարզի հատուկ դպրոցները դեռ կշարունակեն գործել հին կարգավիճակով
Հատուկ դպրոցների վերակազմակերպման խնդիրը շարունակում է մտահոգել կրթության առանձնահատուկ պայմանների կարիք ունեցող երեխաների ծնողներին և հատուկ դպրոցների աշխատակիցներին: Խնդրի լուծման վերաբերյալ Արմավիրի մարզպետ Գագիկ Միրիջանյանը հանդիպել է նրանց հետ և տեղեկացրել գործընթացի ժամանակվոր դադարեցման մասին:
Նոր ուսումնական տարում համընդհանուր ներառական կրթության անցնելու կապակցությամբ հատուկ դպրոցները վերակազմակերպվելու էին տարածքային մանկավարժահոգեբանական աջակցության կենտրոնների:
Արմավիրի մարզպետարանի դահլիճում Արմավիրի թիվ 1 և Վաղարշապատի թիվ 2 հատուկ դպրոցների երեխաներն էին, նրանց ծնողներն ու մանկավարժները: Չնայած շոգին նրանք անհանգիստ շարժումներ չէին անում և լուռ սպասում էին մարզպետին, ինչը չէր կարելի ասել մյուս հանդիպումների ժամանակ, երբ դահլիճում համայնքապետերն են կամ դպրոցների տնօրենները: Մարզի հատուկ դպրոցների երեխաներն այժմ արձակուրդում են և գտնվում են տանը, իսկ նախատեսվածի համաձայն, սեպտեմբերի 1-ից պետք է հաճախեն ներառական կրթություն իրականացնող հանրակրթական դպրոցներ: Երեխաների ծնողները գտնում են, որ մտավոր և ֆիզիկական ծանր խնդիրներ ունեցող երեխաները չեն կարող ներառվել հանրակրթական դպրոցներում, և նշում են, որ անցումը պետք է աստիճանաբար լինի:
Զեմֆիրան նշում է, որ տարիներ շարունակ իր 14-ամյա աղջկա վարքն անկառավարելի է եղել, և հատուկ դպրոցում մասնագիտական թիմի աշխատանքը տեսանելի արդյունք է գրանցել: Նկատելով վարքագծային, խոսքի դրական տեղաշարժը մայրն անհանգստացած է ներառական կրթության դեպքում դրանք կորցնելուց:
Մտավոր ծանր կարողություն ունեցող երեխաներ նույնպես կան, որոնց նկատմամբ առավել ուշադրություն են ցուցաբերում դաստիարակները, հոգեբաններն ու սոցիալական-հատուկ մանկավարժները: Մուժեղ Հակոբյանը 2 տղաներին միայնակ է մեծացնում, Սասունին պահելը մեծ ջանք և հմտություն է պահանջում:
,,Դպրոցում հատուկ հոգատար վերաբերմունք է ցուցաբերվում երեխային, հատուկ սնունդ են տալիս, որպեսզի արյան մեջ սպիտակուցները չշատանան,,:
Փակվելու դեպքում Սասունի հայրն ասաց, որ նստելու է տանն ու որդուն խնամի, խոսք չունեցող տղան չի կարող ներառվել հանրակրթական դպրոցում: Այս կարծիքին է նաև Արմավիրի թիվ 1 գիշերօթիկ դպրոցի դաստիարակ-խմբավար Նարինե Մանուկյանը
,,Եթե այս երեխաները ներառվեն ներառական կրթության մեջ, միանշանակ ներառական կրթությանը պատրաստ չեն հանրակրթական դպրոցի և ոչ մի ուսուցիչ,,: Պատճառաբանությունը հիմքեր ունի: Մարզի 111 դպրոցից 51-ում է իրականացվում ներառական կրթություն, որտեղ հիմնականում ներառված են հուզակամային խնդիրներ ունեցող երեխաները: Հանրակրթական դպրոցներում մասնագետների մի մասն է վերապատրաստված, նրանք չեն կարող աշխատել հատուկ դպրոցների երեխաների հետ:
Հատուկ դպրոցները տարածքային մանկավարժահոգեբանական աջակցության կենտրոնների վերակազմակերպմամբ մտահոգված են նաև ուսուցիչները, հատկապես նրանք, ովքեր ունեն միջնակարգ-մասնագիտական մանկավարժական կրթություն:
Արմավիրի մարզի հատուկ դպրոցների բարձրացրած խնդիրները խորքային ուսումնասիրելու և լուծում տալու նպատակով մարզպետ Գագիկ Միրիջանյանը տեղեկացրեց, որ անորոշ ժամանակով հետաձգվել է գործընթացը, որպեսզի կարողնան հասկանալ մարզի կրթական համակարգը որքանով են պատրաստ դրան. ,,Այս փուլում ես վստահ եմ, որ մենք պատրաստ չենք: Դրա համար եմ ես խնդրել իմ վերադաս մարմնին, որպեսզի այդ գործընթացն այս պահի դրությամբ դադարեցվի,,:
Արմավիրի թիվ 1 հատուկ գիշերօթիկ դպրոցը խորհրդային տարիներին ունեցել է տիպային մեծ կառույց, որը տրվել է ռազմամարզական վարժարանին, իսկ հատուկ դպրոցը տեղակայվել մանկապարտեզի շենքում: Վաղարշապատի թիվ 2 հատուկ դպրոցը տիպային կառույց է՝ բոլոր հարմարություններով: Երկու դպրոցում սովորում է 174 երեխա: