Վաղ առավոտից սկսած՝ մի խումբ ակտիվիստներ փակել էին Երևանի քաղաքապետարանի մուտքերը, որպեսզի քաղաքապետ Տարոն Մարգարյանը չկարողանար մուտք գործել քաղաքապետարանի շենք: Նրանց խոսքով՝ մուտքը փակել էին որպես հանցագործության վայր։
Պատճառը՝ երեկ երեկոյան վարչապետի օգնական Արեն Մկրտչյանի հրապարակած տեսանյութ էր, ըստ որի՝ Տարոն Մարգարյանն ամբողջ կյանքի ընթացքում լինելով բացառապես պետական պաշտոնյա՝ կուտակել է բավականին մեծ ունեցվածք:
Ակտիվիստներին միացել էին նաև Երևանի ավագանու անդամները, որոնք նշում էին, որ իրենց համար բացարձակ զարմանալի չէին տեսանյութում հրապարակված փաստերը, քանի որ դրա մասին իրենք բազմիցս են խոսել:
Երևանի ավագանու անդամ «Երկիր Ծիրանի» կուսակցություն ղեկավար Զարուհի Փոստանջյանը նշում է, որ Տարոն Մարգարյանն այս գործով որպես մեղադրյալ պետք է ներգրավվի:
Շուրջ երկու ժամ տևած ակցիայից հետո, մասնակիցները որոշեցին դադարեցնել իրենց բողոքի գործողությունները, երբ կոռուպցիայի դեմ պայքարի գծով վարչապետի օգնական Արեն Մկրտչյանը «Ֆեյսբուք»-ի իր էջի միջոցով հայտարարեց, որ FACT TV-ի կողմից Տարոն Մարգարյանի ունեցվածքի վերաբերյալ հրապարակված հետաքննական ֆիլմի ամբողջ նյութերը փոխանցվել են ԱԱԾ-ին։
Դրանք կկցվեն «Երևան» հիմնադրամի՝ առնչությամբ հարուցված քրեական գործին։ Ի դեպ, հիմնադրամի հոգաբարձուների խորհրդի նախագահը Տարոն Մարգարյանն է: