Ինչպես են Էջմիածնում արձագանքում իրադարձություններին
Մի քանի օրվա թոհ ու բոհից հետո Էջմիածին քաղաքն այսօր արդեն հանգիստ էր: Քաղաքապետարանում պաշտոնատար անձանց դռները փակ էին: Մամուլի պատասխանատուն ասաց, որ արդեն նախկին քաղաքապետ Կարեն Գրիգորյանի հեռախոսահամարն անհասանելի է: ԱԱԾ հունիսի 17-ին հրապարակեց ԱԺ պատգամավոր, գեներալ Մանվել Գրիգորյանի առանձնատան խուզարկության տեսանյութը, որից հետո գեներալի որդին՝ Էջմիածնի քաղաքապետ Կարեն Գրիգորյանը, իր ֆեյսբուքյան էջում գրել էր, որ հրաժարական է տալիս իր կամքով:
Էջմիածնում բոլորը վերջին օրերի դեպքերն էին քննարկում՛ սպասված բացահայտումներ էին, ասում էին: Սակայն շոկի մեջ էին՛ զինվորին հասցեագրված օգնությունը սեփական կենդանիներին կերակրի բաժին դարձնելու լուրն էր ցնցել:
ԵԿՄ նախագահ Մանվել Գրիգորյանի խորհրդական Վարդան Վարդանյանը «Ռադիոլուր»-ի հետ զրույցում փոխանցեց, որ հիմա էլ է կրկնում նախկին թեզը՛ արածների համար պետք է պատասխան տալ:
«Վրդովված են տղերքը, չեն էլ ուզում հավատալ, որ կարող է նման բան լինել: Ու եթե եղած լինի, բոլորն էլ կդապարտեն: Ըտենց մարդու հետ մի օր չեմ աշխատի իհարկե, եթե նման բաներ արել է»:
Մանվել Գրիգորյանի օգնական Մեսրոպ Մանուկյանը ևս կդադարեցնի գեներալի հետ աշխատանքը, եթե քննությունը հաստատի լուրը:
«Եթե այս ամենը դառնա իրականություն, իմ համար կլինի մեծ շոկ: Ու այդ ժամանակ ես բոլորիդ ներկայությամբ իմ խիստ դիրքորոշումը կներկայացնեմ: Իմ հալալ եղբայրը, եթե նման բան անի, իմ համար անընդունելի կլինի, ուրեմն ես եղբայր չունեմ»:
ՊՆ մամուլի քարտուղար Արծրուն Հովհաննիսյան էլ կառավարության այսօրվա արտահերթ նիստից հետո լրագրողների հետ հանդիպման ժամանակ ասել է, որ այն ապրանքները, որոնք արտադրված են զինված ուժերի համար և հայտնաբերվել են Մանվել Գրիգորյանին պատկանող ամառանոցում, երկու հիմնական ճանապարհով օրինական կարգով փոխանցվել են Երկրապահ կամավորական միությանը: Շուրջ 20 տարի ԵԿՄ պահեստազորի բանակումներ է իրականացրել, որի ժամանակ դիմել է Պն-ին և ստացել տարբեր տեսակի իրեր: Սակայն թե ինչ նպատակների են ծառայել ապրանքները, դրա վերահսկողություն պաշտպանության նախարարությունը չունի, նշեց Արծրուն Հովհաննիսյանը:
Մանվել Գրիգորյանին պատկանող ավտոպարկում հայտնաբերված ապրիլյան քառօրյա պատերազմի օրերին պաշտպանության բանակի համար նախատեսված շտապօգնության մեքենայի վերաբերյալ ՊՆ մամուլի քարտուղարը նշեց, որ շտապօգնության մեքենաների կարիք բանակը միշտ ունի: Կարևորն այն չէ, որ բանակը դրա կարիքն ունի, թե՛ ոչ: Կարևորն այն է, որ նվիրատված որևէ միջոց չի հասել հասցեատիրոջը: