«Դադարեցնենք քաղաքացիների հետևից ընկնել, որովհետև դա հավելյալ հարկ է քաղաքացիների վրա»,- կառավարության նիստում հայտարարել է վարչապետ Նիկոլ Փաշինյանը:
Ոստիկանապետ Վալերի Օսիպյանն էլ հայտնել է, որ առաջիկայում ճանապարհային երթևեկության կանոնների խախտման տուգանքի չափերի նվազեցման մասին օրինագիծ կներկայացնեն կառավարության հաստատմանը: Օսիպյանի կարծիքով, տեսանկարահանող սարքերը զսպման մեխանիզմ են:
Նա նաև հիշեցրել է՝ Ճանապարհային ոստիկանը պարտավոր է տեղեկացնել վարորդին, որ իրենց խոսակցությունը ձայնագրվում է: Կառավարության նիստում բուռն քննարկման առարկա դարձած նախագծի հեղինակը ՀՀԿ- ն էր՝ խորհրդարանական մեծամասնությունը։
Երթևեկության անվտանգությունն ապահովելիս արգելել ոստիկանության կողմից շարժական տեսաձայնագրող կամ լուսանկարահանող տեխնիկական միջոցների օգտագործումը: Առաջարկը խորհրդարանական մեծամասնություն կազմող ՀՀԿ-ական մի քանի պատգամավորներինն է: Հիմնավորումները բավարար չեն՝ հայտարարեց ոստիկանության պետ Վալերի Օսիպյանը:
Կառավարության ղեկավարի խոսքով, հանրությունը երեք տեսակի շարժական սարքի մասին գիտի, ուստի. «Ես ուզում եմ հասկանալ՝ որին է վերաբերում»:
Վալերի Օսիպյանի հստակեցմամբ, խոսքը շարժական տեսախցիկների մասին է: Սա վարորդներին հնարավորություն է տալու նախապես տեսնել այն մեքենան, որտեղ տեսախցիկը կա: Նիկոլ Փաշինյանի աձագանքը լսենք. «Մենք հակասությունների մեջ ենք մտնում, մենք անընդհատ ասում ենք մարդկանց քիչ տուգանենք, մյուս կողմից ասում ենք՝ բերենք էդ շրջիկ մեքենաներն էլ ավելացնենք, ավելի շատ տուգանենք: Կարծում եմ՝ մենք այստեղ պրոբլեմ ունենք»:
Կառավարության ղեկավարի խոսքով, խնդիր կա նաև ոստիկանների համազգեստներին ամրացված տեսախցիկների հետ:
«Դադարեցնենք քաղաքացիների հետևից ընկնել, որովհետև դա հավելյալ հարկ է քաղաքացիների վրա։ Երթևեկության անվտանգության խնդիրը ճանապարհների որակով լուծեք, որ մարդը ստիպված չլինի ճանապարհի կենտրոնում անդունդի հանդիպի, որ ստիպված պտտվի թռնի ձորը»:
Վալերի Օսիպյանի դիտարկմամբ, հարցը պետք է կարգավորել, որովհետև կան վարորդներ, քաղաքացիներ, որոնց մոտ անպատժելիության մթնոլորտ է ձևավորվում։ Ոստիկանության ուսումնասիրություններն են դա ցույց տվել։ Վարչապետի դիտարկմամբ, պետք է այնպես աշխատել, որ անպատժելիության մթնոլորտ չստեղծվի։
Փոխվարչապետ Տիգրան Ավինյանն առաջարկեց միջազգային փորձն ուսումնասիրել: Առաջին փոխվարչապետ Արարատ Միրզոյանն արձագանքեց՝ պետք է անմիջապես ձեռնամուխ լինել ավելի համալիր առաջարկների:
Արդարադատության նախարար Արտակ Զեյնալյանի դիտարկմամբ էլ՝ պետք է խնդրին ժամանակավորապես լուծում տալ:
Կառավարությունում պայմանավորվեցին՝ շարժական տեսախցիկները չեն գործի:
