Կառավարության այսօրվա նիստում ոստիկանության պետ Վալերիյ Օսիպյանը ներկայացրեց «Ոստիկանության մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության օրենքի նախագծի վերաբերյալ Հայաստանի Հանրապետության կառավարության առաջարկության նախագիծը:
«Ներկայացվող օրինագծով առաջարկվում է երթևեկության անվտանգությունը ապահովելիս արգելել ոստիկանության կողմից շարժական տեսաձայնագրող կամ լուսանկարահանող տեխնիկական միջոցների օգտագործումը»,- ասաց նա:
Օսիպյանը նշեց, որ ոստիկանությունը կարևորում է շարժական տեխնիկայի օգտագործման մասին հանրային անհրաժեշտության գաղափարն ու այդ ուղղությամբ նախաձեռնել է ոստիկանական պարեկային գործողությունը կանոնակարգող իրավական ակտերի փոփոխություններ:
«Առաջարկվում է ոստիկանության մասին օրենքի 22-րդ հոդվածը թողնել անփոփոխ», — նշեց նա:
Նիկոլ Փաշինյանն էլ արձագանքեց, թե հանրությունը գիտի երեք տեսակի շարժական սարքի մասին:
«Ես ուզում եմ հասկանալ՝ որին է վերաբերում», — հետաքրքրվեց վարչապետը:
Վալերի Օսիպյանն էլ ասաց, թե խոսքը վերաբերում է շարժական մեքենաներին, որոնք հատուկ կահավորված
հատուկ կահավորված են լինելու, որը վարորդներին հնարավորություն է տալու նախապես տեսնել մեքենան:
«Մենք հակասությունների մեջ ենք մտնում, մենք անընդհատ ասում ենք մարդկանց քիչ տուգանենք, մյուս կողմից ասում ենք՝ բերենք էդ շրջիկ մեքենաներն էլ ավելացնենք, ավելի շատ տուգանենք: Կարծում եմ՝ մենք այստեղ պրոբլեմ ունենք», — ասաց վարչապետը:
Նա ընդգծեց, որ խնդիր կա նաև ոստիկանների համազգեստներին ամրացված տեսախցիկների հետ կապված:
«Դադարեցնենք քաղաքացիների հետևից ընկնել, որովհետև դա հավելյալ հարկ է քաղաքացիների վրա, երթևեկության անվտանգության խնդիրը ճանապարհների որակով լուծեք, որ մարդը ստիպված չլինի ճանապարհի կենտրոնում անդունդի հանդիպի, որ ստիպված պտտվի թռնի ձորը», — ասաց Նիկոլ Փաշինյանը:
