Կառավարության ծրագիրն առաջին փաստաթուղթն էր, որի քննարկումը խորհրդարանում ընթացավ առանց բացարձակ մեծամասնության: 6 պատգամավորի հեռացումը Հանրապետական խմբակցությանը կայուն մեծամասնությունից վերածեց պարզապես մեծամասնության:
ՀՀԿ-ն 52 պատգամավորով այսօր էլ ամենամեծ խմբակցությունն է, խորհրդարանում, բայց արդեն մեծամասնություն չէ: Խմբակցությունը լքել են հիմնականում գործարար պատգամավորները:
Հանրապետական պատգամավոր, Ազգային ժողովի նախկին նախագահ Գալուստ Սահակյանը կարծում է, որ չգրված օրինաչափություն է՝ իշխանական կուսակցությունը ձգում է շատերին. ոչ իշխանական դառնալուց հետո նույնքան գրավիչ չէ:
Սահակյանը ՀՀԿ-ից հեռացող գործարարներին չի մեղադրում, չի կարծում, որ ժամանակին շահադիտական նպատակներն էին նրանց ստիպել անդամակցել խմբակցությանը, բայց նաև քայլը թուլության նշան է համարում:
«Ես որևէ մեկին չեմ մեղադրում, բայց կարծում եմ, որ այդպես թույլերն են անում»:
Անկեղծ, անգամ զարմալաի էր ԱԺ նախկին նախագահի պատասխանը հարցին, թե ինչ ներկայություն է ակնկալում Հանրապետականը արտահերթ ընտրությունների արդյուքնում:
«Եթե այս կառավարությունը կարողանա իրագործել իր առջեւ դրած խնդիրները, լավ կլինի, որ ՀՀԿ քիչ տոկոս ստանա»:
2017 թվականի ապրիլի 2-ի ընտրություններում 770 441 ձայն հավաքած, դրա արդյունքում 58 պատգամավորական մանդատ ստացած ՀՀԿ կուսակցության խորհրդարանական խմբակցությունն այլևս Ազգային ժողովում բացարձակ մեծամասնություն չէ:
Խմբակցությանը «բացարձակի» այս որակից զրկողը եղավ գործարար պատգամավոր Սամվել Ալեքսանյանը. նա խմբակցությունից դուրս գալու դիմում գրած 6-րդ պատգամավորն է, ու նրա գնալով է, որ ՀՀԿ-ի անդամների թիվը 53-ից դարձավ 52:
Խմբակցության ղեկավար Վահրամ Բաղդասարյանը կարծում է՝ գործարարների հեռանալով խմբակցությունը ինքնամաքրվում է: Հանրապետական Արմեն Աշոտյանը չի բացառում, որ գործարարաների հեռացման մեջ դեր ունեն քաղաքական հնարավոր ռեպրեսիաները:
Աշոտյանի ակնարկած քաղաքական ռեպրեսիաների մասին դիտարկմանը Նիկոլ Փաշինյանն այսպես է արձագանքում.
«Աշոտյանին ու մյուս հանրապետականներին, որ նայում ենք, զգացվում է՝ նրանք բոլորը հալածված են»։
Արտահերթ ընտրությունների մասին հարցին վարչապետ Փաշինյանը պատասխանեց նույն ամրագրումով, որով այն տեղ է գտել ծրագորւմ: Ընտրությունները տեղի կունենան առավելագունը մեկ տարվա ընթացքում: Ուշ աշնանը թե գարնանը՝ ցույց կտա քաղաքական նպատակահարմարությունը:
Ի դեպ, Փաշինյնաը չհերքեց լրագրողներից մեկի այն հարցը, որ ծրագրի հաստատման դեպքում արտահերթ ընտրությունների հավանական տարբերակը կմնա վարչապետի հրաժարականը հարցին, թե երբ սպասել այդ հրաժարականին, տվեց նույն պատասխանը՝ մեկ տարվա ընթացքում:
