Տեխզննության կտրոնն այս տարի գնող վարորդները նկատել են, որ այն թանկացել է։ «Ռադիոլուրը» գնաց բողոքների հետքերով։ Պարզվեց, որ թանկացել է բնապահպանական վճարը, այլ ոչ թե տեխզննության կտրոնը։
Ուղղակի վճարները կատարվում են մեկ կտրոնով։ Բնապահպանական վճարների եւ տեխզննության անհրաժեշտությանն հետքերով է գնացել «Ռադիոլուրը»:
Վարորդ Սուրեն Հարությունյանը Էրեբունի վարչական շրջանի թաղապետարանում տեխզննման կտրոնի վճարման ժամանակ է իմացել, որ շահագործման պիտանիության փաստաթուղթը թանկացել է:
«Ես էլ չմուծեցի, գնացի բանկ՝ մտածելով, որ թաղապետարանում երևի ավել գումար են վերցնում: Գնացի «Հայբիզնեսբանկ», այնտեղ էլ ասեցին, որ 13800 դրամ է: Ասեցի պատճառն ինչումն է, որ թանկացել է, կբացատրեք: Ասացին, սա թուղթն է, ֆինանսների նախարարն է թանկացրել: Բնապահպանական հարկի համար է»:
Նախկինում նույն կտրոնի համար վարորդ զրուցակիցս վճարել է 9300 դրամ: Սակայն այս անգամ տեխզննման կտրոնը թանկացել է մոտ 5000 դրամով: Վարորդների աղմուկին, որ թանկացել են տեխզննման կտրոնները, տրանսպորտի, կապի և տեղեկատվական տեխնոլոգիաների նախարարության տրանսպորիտի վարչության պետի տեղակալ Դավիթ Մելքոնյանը «Ռադիոլուրի» հետ զրույցում նշեց՝ թանկացել է բնապահպանական վճարը, որը տեխզննման վճարի հետ միաժամանակ է գանձվում:
«Դա տեխնիկական զննության հետ որևէ կապ չունի: Պետք չի դա կապել տեխնիկական զննության կտրոնի թանկացման հետ: Այդ դեպքում, ինչու՞ են բնապահպանական հարկը և տեխնիկական զննության վճարը միասին գանձել տալիս: Հետաքրքիր հարց է, այդպես է դրված, որպեսզի հնարավոր լինի, այդ գումարը գանձել»:
Թե երբ է թանկացել բնապահպանական վճարը, Դավիթ Մելքոնյանը դժվարացավ պատասխանել: Բնապահպանական վճարների թանկացման և այն տեխզննման վճարների հետ միաժամանակ գանձելու վերաբերյալ փորձեցինք պարզաբանում ստանալ Ֆինանսների նախարարությունից: Ասացին, որ նախտատեսում են կրճատել բնապահպանական վճարը, հունիսի 5- ին այդ հարցով խորհրդակցություն են հրավիրել։ Ամեն տարի վարորդները վճարում են տեխզննության համար, սակայն իրականում մեքենաները որևէ ստուգում չեն անցնում: Կտրոնն էլ տրամադրում է թաղապետարանը՝ առանց մեքենան տեսնելու: Մի քանի տարի առաջ որոշվեց, որ տեխզննության կտրոնը պարտադիր է, իսկ մեքենան զննելը՝ վարորդի ցանկությամբ։
Տրանսպորտի նախարարության պատասխանատուն «Ռադիոլուր»-ին պարզաբանեց, որ վարորդներին միշտ են հորդորել տեխնիկական զննության կտրոնը գնելուց հետո մեքենան տանել տեխնիկական զննության: Այն, որ հորդորին ոչ բոլոր վարորդներն են հետևում, Դավիթ Մելքոնյանն ինքն էլ փաստեց:
«Եթե վարորդը չի գնում տեխնիկական զննության անցկացնելու, այդ դեպքում ինչու՞ է վճարում մի ծառայության համար, որը չի կատարել: Որովհետև տեխնիկական զննությունը ՀՀ-ում պարտադիր է»:
Էրեբունի վարչական շրջանում գտնվող տեխզննման կայանում մեր այցի ժամանակ մեքենա չկար: Աշխատակիցը չցանկացավ ձայնագրվել, սակայն զրույցի ժամանակ նշեց, որ լինում են վարորդներ, ովքեր տեխզննման կտրոնը գնելուց հետո մոտենում են մեքենայի տեխնիկական վիճակը ստուգելու համար: Նրանց թիվը մեծ չէ՝ շեշտեց։
