Քաղաքական

Հետհեղափոխական օրակարգի գլխավոր խնդիրը ԱԺ արտահերթ ընտրություններն են


Քաղաքական քարտեզի փոփոխություններ եւ հասարակական-քաղաքական փոփոխությունների պահանջ. հետհեղափոխական Հայաստանի ներքաղաքական օրակարգը:

Այս խորագրով քննարկում է այսօր կազմակերպել Մամուլի ազգային ակումբը: Մասնակիցներն անդրադարձել են վերջին ներքաղաքական իրողություններին եւ դրանցով պայմանավորված որոշակի անորոշությունների:

Մասնավորապես՝ հարցին, թե որոնք են հայաստանյան ներքաղաքական կյանքի առաջնահերթությունները, ո՞ր խնդիրներն են, որ օր առաջ լուծումներ են պահանջում՝ հանրային պահանջով պայմանավորված:

Քննարկման մասնակիցների հիմնական մասը կարծիք է հայտնել, որ առաջնահերթ խնդիրը արտահերթ  խորհրդարանական ընտրությունների կազմակերպումն է, սակայն, որոշ օրենսդրական, հատկապես՝ ԸՕ-ում փոփոխություններ կատարելուց հետո:

 

 

Սիրո եւ հանդուրժողականության հեղափոխության այս պահի գլխավոր խնդիրն, ըստ Ժառանգություն կուսակցության նախագահ Արմեն Մարտիրոսյանի, պետք է լինի հնարավորինս արագ ԱԺ արտահերթ ընտրությունների կազմակերպումը:

«Անպայման այս տարվա կտրվածքով: Երկրորդը՝ պետության օպերատիվ կառավարումն է: Ուրիշ որեւէ խնդիր ես այս պահին չեմ տենում»:

Այն օրակարգը, որ քաղաքացիները առաջարկել, պահանջարկել եւ պատվիրել են Նիկոլ Փաշինյանին, հենց այդ շրջանակում է եղել՝  հավելեց Արմեն Մարտիրոսյանը՝ նկատելով, թե որեւէ այլ ծրագրային դրույթներ քաղաքացիների կողմից պատվիրակված՝ մենք չեն տեսել: Պատվիրվել է, որ Նիկոլ Փաշինյանը պետք է լինի վարչապետ եւ նրա վարչապետության ժամանակահատվածում երկիրը բերվի արտահերթ ընտրությունների վիճակի՝ ասաց:

Նրա խոսքով՝ որեւէ բան այս օրակարգում չի փոխվում, եթե անգամ ՀՀԿ-ն խորհրդարանում դառնում է փոքրամասնություն: ԱԺ Հանրապետական խմբակցության ղեկավար Վահրամ Բաղդասարյանը, մեզ հետ զրույցում անդրադառնալով արտահերթ խորհրդարանական ընտրությունների վերաբերյալ հարցին, ասաց.

«Որեւէ առաջարկություն կամ քննարկման առաջարկ չի եղել: Այդ պատճառով, ես որեւէ ասելիք չեմ կարող ունենալ: Երբ որ կլինի քննարկման առաջարկություն, իսկ դա խորհրդարանական ուժերի հետ պետք է այդ քննարկումը կազմակերպվեն: Մենք որեւէ քննարկումից չենք հրաժարվում եւ կարող ենք խոսել դրա մասին»:

Որեւէ հարցի շուրջ քննարկումից հրաժարվելն անթույլատրելի է՝ եզրափակեց ԱԺ ՀՀԿ խմբակցության ղեկավար Վահրամ Բաղդասարյանը:

Արմեն Մարտիրոսյանն այսօր խոսելով արտահերթ ընտրությունների գնալու իրավական ձեւերի մասին՝ ասաց:

ԳԽ նախկին պատգամավոր Արամ Մայիլյանը կարծում է, որ հեղափոխությունը համահայկական ջանքերի արդյունք էր, բավականին օժանդակություն եղավ սփյուռքից, հետեւաբար հետհեղափոխական օրակարգի խնդիրների ձեւավորման հարցում պետք է հաշվի առնվի նաեւ այդ հանգամանքը:

Հեղափոխությունից հետո հասարակական տրամադրությունները, որ եկան հրապարակ, ակնհայտ է, չեն արտահայտում այն քաղաքական քարտեզը, որը գոյություն ունի այսօր ԱԺ-ում՝ ասաց ՀՅԴ ներկայացուցիչ Բագրատ Եսայանը՝ շեշտելով, որ ներկայացնում է ոչ թե Դաշնակցության, այլ՝ իր տեսակետը, իհարկե, ելնելով կուսակցության մոտեցումներից:

Իրավական մեխանիզմները կան՝ կարծիք հայտնեց Բագրատ Եսայանը: Ըստ նրա, սակայն, իրատեսական չէ շատ արագ կազմակերպումը, քանի որ անհրաժեշտություն կա նախեւառաջ Ընտրական օրենսգրքի փոփոխության: Պետք է փորձել ապամոնտաժել օրենսգրքում ՀՀԿ-ի կողմից թաքցրած ստորջրյա խութերը: Առաջին հերթին խոսքը ռեյտինգային համակարգի մասին է, որը չարիքի արմատն է՝ ասաց նա: ՕԵԿ-ի դիրքորոշումն այսօր ներկայացրեց կուսակցության փոխնախագահ Մհեր Շահգելդյանը: Նա համամիտ է, որ ԸՕ-ի կտրուկ փոփոխություններն առաջնային են:

Խոսելով հետհեղափոխական խնդիրների, անելիքների մասին՝ Մհեր Շահգելդյանը կարծիք հայտնեց, որ ապագա քաղաքական օրակարգն այսօր արդեն իսկ պետք է տեսանելի լինի: «Այլընտրանքային նախագծեր» կազմակերպության ղեկավար Վահե Հովհաննիսյանի գնահատմամբ՝ հեղաոխության արդյունքում տեղի է ունեցել քաղաքական դաշտի «դեֆոլտ» եւ այս իրավիճակում.

«Եթե չստեղծվեն նոր ուժեր եւ նոր դաշինքներ, մյուս խորհրդարանն ավելի լավը չի լինելու, քան այս եւ նրա ստեղծած պրոբլեմները, բառիս բուն իմաստով, երեք-չորս ամիս հետո լինելու են նույնքան վատ, շատ ավելի վատ եւ մենք կարող ենք բառիս բուն իմաստով ունենալ դիկտատուրա»:

Վահե Հովհաննիսյանի ձեւակերպմամբ՝ հետհեղափոխական օրակարգ գոյություն չունի, իսկ այն պետք է ձեւավորել-ունենալ քննարկումների արդյունքում: Նա նաեւ մեկ հարցադրում-խնդիր ձեւակերպեց, թե՝ արդյո՞ք, նրանք, ովքեր իշխանություն են, կուզենան լսել:

«Պոլիտէկոնոմիա» հետազոտական ինստիտուտի տնօրեն Անդրանիկ Թեւանյանի խոսքով՝ լեգիտիմ չի կարող համարվել նաեւ արտահերթ այն ընտրությունը, որը տեղի կունենա նախքան ԸՕ-ի փոփոխությունը՝ հայտնի սկզբունքների շրջանակներում:

Նա շեշտեց, որ տեխնիկական դետալների մեջ տեսնում է նաեւ ընտրացուցակների հստակեցումը, ինչի մասին նախկինում էլ շատ է խոսվել: Նրա ձեւակերպմամբ, արտահերթ ընտրությունների լեգիտիմության առումով, կարեւորում է նաեւ, իր ձեւակերպմամբ, Սերժ Սարգսյանի համար կարված սուպերվարչապետության փոփոխության ենթարկելը, սակայն, մինչեւ արտահերթ ընտրությունները:

Ցուցադրել ավելի
Back to top button