Վերջերս ԿԳ նախարար Արայիկ Հարությունյանը ֆեյսբուքյան իր էջում տարածել էր, որ պետական բուհերի ռեկտորների հետ հանդիպման ժամանակ նրանց ազատել է Հայաստանի երիտասարդական հիմնադրամին պարտադիր գումարներ վճարելու պարտականությունից:
Հիմնադրամի հետագա ճակատագրի մասին «Ռադիոլուր»-ի հարցմանը կառույցից խոստացել են պատասխանել վաղը: «Ռադիոլուրը» զրուցել է նվիրատվություն կատարած կառույցների ղեկավարների հետ, լսել նրանց դիրքորոշումը:
Կրթության և գիտության նորանշանակ նախարար Արայիկ Հարությունյանը բուհերի ռեկտորներին ազատում է Հայաստանի երիտասարդական հիմնադրամին կատարվող վճարումներից։
«Հսկայական գումարների ավելացում կրթական համակարգում:
-Ասում էիք փող չկա»,- ֆեյսբուքյան էջում գրել է նախարարը։
Երիտասարդական հիմնադրամի 2017 թվականի ամենախոշոր նվիրատուներից է Երևանի պետական համալսարանը, փոխանցել է է 125 միլիոն դրամ: Ռեկտոր Արամ Սիմոնյանը «Ռադիոլուր»-ի հետ զրույցում հայտնեց, որ պարտավոր են ենթարկվել նախարարության որոշմանը:
Արամ Սիմոնյանը թեև 2000-ականներին չի ղեկավարել բուհը, սակայն փոխանցեց այդ ժամանակ ձեռք բերված բանավոր պայմանավորվածությունը: Բուհերը չեն վճարի ավելացած արժեքի հարկը, սակայն դրա փոխարեն իրենց արտաբյուջեի 2 տոկոսը կհատկացնեն երիտասարդական հիմնադրամին՝ երիտասարդական ծրագրերը ֆինանսավորելու համար: Այդ գումարների 50 տոկոսը ծրագրերի տեսքով վերադարձվում է բուհերին՝ ասում է ռեկտորը:
«Օրինակ, մենք վերջին տարիներին 40-50 տոկոսն անում էինք ծրագրերով, այսինքն հետ էինք ստանում: Բուհեր կային, որ չէին անում, բուհեր էլ կային, որ արտաբյուջե չունեին, չէին վճարում»:
Այս տարվա նվիրատվության մի մասը՝ 25 միլիոն դրամը, բուհը կատարել է հունվարին: Սակայն 15 միլիոն դրամը պետական համալսարանին հետ է վերադարձվել ուսանողների վարձավճարների զեղչերի տեսքով:
«Այսինքն ուսանողներին զեղչ է արվել 15 միլիոնի»:
Գիտության պետական կոմիտեի նախագահ Սամվել Հարությունյանը նույնպես նշեց, որ նախարարից նվիրատվությունը դադարեցնելու վերաբերյալ հանձնարարական ստացել են: Այս կառույցը 2017 թվականին հիմնադրամին նվիրաբերել է 100 միլիոն դրամ:
«Վերաբաշխում կանենք և այլ բաների վրա կծախսենք»:
Հայաստանի երիտասարդական հիմնադրամի 2017 թվականի հաշվետվությամբ՝ կառույցը մի քանի տասնյակ կազմակերպություններից ստացել է ավելի քան 650 միլիոն դրամի նվիրատվություն, ևս 280 միլիոն դրամ ստացել է պետբյուջեից:
Կրթության փորձագետ Սերոբ Խաչատրյանը համաձայն է նախարարի որոշման հետ: Դա հնարավորություն կտա բուհերին ինքնուրույն կառավարել իրենց գումարները: Սակայն համաձայն չէ այն դիտարկմանը, թե դրանով բուհերը խոշոր գումարների խնայողություն կկատարեն։ Գումարների մի մասը ծրագրերի տեսքով հետ էր վերադարձվում բուհերին, ասում է: Ուսանողների վճարած վարձավճարներով օգնության կարիք ունեցող ուսանողներին աջակցող հիմնադրամի գործունեությունը որքանո՞վ է անհրաժեշտ.
«Հիմնադրամի ղեկավարությունը կառավարությունն է: Նախագահը Նիկոլ Փաշինյանն ինքը պետք է որոշի շարունակում են, չեն շարունակում: Ես դեմ եմ, որ շարունակովի: Կարծում եմ, բուհերն իրենք պետք է տնօրինեն»:
ԱԺ ՀՀԿ խմբակցության ղեկավար Վահրամ Բաղդասարյանը հիշեցրեց, որ հիմնադրամի հոգաբարձուների խորհրդի նախագահը հանրապետության վարչապետն է, իսկ հոգաբարձուների խորհրդի անդամներից մեկը կրթության և գիտության նախարարը:
«Այսօրվա նախարարը պետք է իմանա, որ դա որևէ անձի հիմնադրամ չէ: Եվ եթե ձևակերպումները ճիշտ կլինեն, դրա մասին արդեն կարելի է խոսել»:
Երիտասարդական հիմնադրամից խոստացան մեր հարցերին պատասխանել վաղը:
