Երեկ Արմավիրում գրանցվել է զանգվածային սննդային թունավորման դեպք և երեկոյան ժամը 17-ի սահմաններում Արմավիրի հիվանդանոց են տեղափոխվել «Տեռաս դե Արմենիա Հայաստանի հողեր» ընկերությունան աշխատակիցները: Այգեգործներին ընդմիջման ժամին տրվել է հավի մսով, կարտոֆիլով սնունդ:
Հիվանդների վիճակը բավարար է և այսօր սկսել են դուրս գրել հիվանդանոցից: Մեծամոր բժշկական կենտրոնի տնօրեն Միքայել Վանյանը տեղեկացրեց, որ միայն 5 հոգի է ջերմում, և նրանց բուժումը կշարունակվի 1-2 օր:
Արմավիրի և Մեծամորի բժշկական կենտրոններում մարդկանց մեծ հոսք և հիվանդների հոսպիտալացում եղել էր 1998թ-ին, երբ Զարթոնքում բռնկվել էր խոլերայի համաճարակը: Սակայն հիմա հիմա ոչ թե համաճարակ է, այլ թունավորում: Գրեթե աշխատանքային օրվա ավարտին Արևադաշտ գյուղում գտնվող «Հայաստանի հողեր» ՓԲԸ-ից թունավորման ախտանիշով Արմավիրի բժշկական կենտրոն սկսեցին տեղափոխվել հիվանդներ:
Արգենտինացի հայ գործարար Էդուարդո Էռնեկյանին պատկանող ,,Տեռաս դե Արմենիա Հայաստանի հողեր,, ընկերությունում աշխատում են Արևադաշտ և հարակից գյուղերի բնակիչները, որոնք զբաղված է խաղողի այգիների մշակմամբ: Այգեգործներին ընդմիջման սնունդը հատկացնում է ընկերությունը: Երեկ ժամը 12-13-ն ընկած ժամանակահատվածում աշխատակիցներին բաժանվել են հավի մսով և տապակած կարտոֆիլով բրդուճներ:
«Ռադիոլուրին» հայտնի է դարձել, որ ընկերության սննդի մատակարարը Մյասնիկյան գյուղում գտնվող Խաչիկ Ավետիսյանին պատկանող ձեռնարկատիրական ընկերությունն է, որը պայմանագրային հիմունքներով սնունդ է մատակարարում «Հայաստանի հողեր» ընկերությանը: Արմավիրի բժշկական կենտրոնի համաճարակաբան Աշխեն Պողոսյանը տեղեկացրեց, որ հիվանդների մոտ նախնական վարկածով սննդային թունավորում է:
Արմավիրի հիվանդանոցում առաջին բուժօգնությունը ցույց է տրվել հիվանդանոցի գրեթե բոլոր բաժանմունքներում, քանի որ ինֆեկցիոն բաժանմունք չունի: Այն սանիտարական անբարվոք վիճակի պատճառով փակվել և 2015թ-ից տեղափոխվել է Մեծամորի հիվանդանոցի առանձին մասնաշենք: Արմավիրի բժշկական կենտրոնի գլխավոր բժիշկ Սարգիս Խաչատրյանը նշեց, որ հինանդներին ընդունել են ժամը 17-ն անց 30 սահմաններում:
Մեծամորի հիվանդանոցի բոլոր բաժանմունքներում՝ ընդհուպ մինչև գինեկոլոգիական, պառկած են թունավորված քաղաքացիները:
Հինանդանոցներում թունավորված հիվանդների հոսքը շարունակվեց մինչև ժամը 22-ը: Արմավիրի փոխմարզպետ Լարիսա Մուրադյանը հավաստիացրեց, որ Արմավիրի և Մեծամորի հիվանդանոցներն ապահովված են համապատասխան դեղորայքով:
Դեպքի առիթով Արմավիրի ոստիկանությունում քրեական գործ է հարուցվել:
